Siglir tar il cuntegn
cuntegn

Naziunal/Internaziunal Broncos er il 2018 il grond favurit

Suenter ina lunga fasa da preparaziun vegn finalmain lantschada la nova stagiun d’American Football en Svizra. Insatge resta tuttina sco ils davos onns. Il grond favurit sin il titel da campiun svizzer resta er quest onn l’equipa grischuna, ils Calanda Broncos.

Purtret dals giugaders dals Calanda Broncos en acziun.
Legenda: Ils Calanda Broncos vulan er quest onn il titel. Keystone

Dapi bun in decenni domineschan ils Broncos la scena d’American Football en Svizra. Dapi il 2009 ha l’equipa grischuna gudagnà set giadas il titel. Sulet il 2014 ed il 2016 han ils Broncos mintgamai stuì sa cuntentar be cun il titel da vice-campiun svizzer.

La finamira per la nova stagiun è cunquai clera – defender il titel e restar sin il tron d’American Football. L’onn passà han ils Calanda Broncos che vegnan trenads da Geoff Buffum gudagnà il final, l’uschenumnà Swiss Bowl, suveran encunter ils Basilea Gladiators cun 42:6.

Er sin palc europeic vulan els il success

Far furora vulan ils Broncos quest onn er puspè ina giada sin palc europeic sco quai che Michel Derungs di, il Sursilvan en il cader dals Calanda Broncos. Il 2012 aveva l’equipa grischuna d’American Football tranter auter gudagnà l'Eurobowl encunter ils Vienna Vikings ed uschia festivà in dals pli gronds success en l’istorgia dal club. L'Eurobowl vala sco la pli impurtanta trofea d’American Football en l’Europa.

RR Sportissimo 17:00