Siglir tar il cuntegn
cuntegn

Naziunal/Internaziunal Brignone gudogna a chasa – Gut manchenta podest

Tar la premiera per la cuppa mundiala a Kronplatz en il Tirol dal Sid gudogna la Taliana Federica Brignone. Per Lara Gut resta la plazza gist dasper il podest.

La Taliana Federica Brignone gudogna avant la Franzosa Tessa Worley e l'ulteriura Taliana Marta Bassino.
Legenda: Il podest a Kronplatz: La Taliana Federica Brignone gudogna avant la Franzosa Tessa Worley e l'ulteriura Taliana Marta Bassino. Keystone

Il podest

  • 1. Federica Brignone (It)
  • 2. Tessa Worley (Fr) +0,55
  • 3. Marta Bassino (It) +0,57
  • 4. Lara Gut (Sz) +0,76

La Tirolaisa dal sid Federica Brignone ha nizzegià las relaziuns idealas per sia segunda victoria en il slalom gigant insumma. Ella ha pudì defender ses avantatg ord l’emprim percurs. Tessa Worley che maina il classament general e l’ulteriura taliana Marta Bassino cumpletteschan il podest.

Lara Gut gist dasper il podest

Per Lara Gut ha quai vis ora ditg bain. Uschia era ella gia suenter l’emprim percurs sin plazza quatter. Ma ella n’ha betg pudì sa megliurar en il segund percurs.

Las ulteriuras giuvnas atletas svizras han mussà ina buna prestaziun. Uschia vegn Camille Rast 9avla. Simone Wild 13avla e Melanie Meillard vegn 16avla. Vinavant vegn la spezialista da slalom svizra Wendy Holdener 23avla.

Fin da stagiun per Charlotte Chable

Per in'autra skiunza svizra è la stagiun dentant a fin: Charlotte Chable. D'in trenament ha la spezialista en la disciplina slalom rut il liom cruschà e sto vegnir operada. Quai rapporta la televisiun da la Svizra franzosa.

La skiunza da 22 onns aveva gia manchentà l'entschatta da la stagiun pervi d'ina blessura. Da tschintg starts n’hai dà nagins puncts per Chable questa stagiun.

Per la Vallesana n’è quai dentant betg stà l’emprima greva blessura dal schanugl: il december 2012 aveva ella rut ils lioms cruschads dad omadus schanugls.

RR novitads 14:00