Siglir tar il cuntegn

Header

Navigaziun

Raeto Raffainer, il schef da las equipas naziunalas da hockey.
Legenda: Raeto Raffainer, il schef da las equipas naziunalas da hockey. Keystone
cuntegn

Naziunal/Internaziunal Bler d'analisar suenter la trumpada a la Cuppa da la Germania

Trais gieus, trais terradas, quai è la bilantscha miserabla da l'equipa naziunala svizra da hockey a la Cuppa da la Germania ad Augsburg. 0:3 encunter il Canada, 2:3 encunter la Germania ed 1:4 encunter la Slovachia. Resultats che ston dar da discurrer.

Discussiuns ed analisas criticas ha quai dà en la centrala da la Federaziun svizra da hockey a Turitg suenter las trais terradas a la Cuppa da la Germania. Patrick Fischer e ses co-trenaders han dà rapport ed han analisà daco che pauc ha funcziunà e tge che sto vegnir meglier.

Il schef Raeto Raffainer vul mirar anavon

L’anteriur attatgader Raeto Raffainer è schef da las diversas equipas naziunalas svizras da hockey. El admetta che pauc ha funcziunà al turnier en Germania. Mo Raffainer defenda era il trenader naziunal Patrick Fischer. Quel haja inizià intginas midadas tacticas, mo el haja gì pauc temp per exercitar quellas. Raffainer è dentant persvas ch’ils giugaders taidlian anc sin Fischer. Ils giugaders sajan stads da buna veglia ed hajan cumbattì, dentant senza fortuna.

Raffainer chapescha la critica

Raeto Raffainer chapescha la critica per part massiva en las gasettas svizras. Quai saja normal suenter trais terradas en roda. Uss saja dentant da mirar enavant e da preparar il proxim turnier. Al turnier da chasa ils 16 e 17 da december a Bienna vul la Svizra far ina meglra figura. Participants èn sper la Svizra la Frantscha, la Belorussia e la Slovachia.

RR actualitad 17:00