En il process pervi da corrupziun cunter trais anteriurs funcziunaris dal ballape sidamerican, ha ina giuria a New York declerà nunculpant in dals accusads. L'anteriur president da la Federaziun peruana, Manuel Burga na saja betg culpant, en connex cun daners da corrupziun da passa 4 milliuns francs.
Venderdi passà avevi dà ina sentenzia da culpaivladad per ils dus ulteriurs funcziunaris accusads, Jose Maria Marin da la Brasilia e Juan Angel Napout dal Paraguay. I sa tracta da l'emprim process che sa fatschenta cun il scandal da corrupziun da la Fifa.
Tenor l'accusa han ils dus funcziunaris uss sentenziads incassà daners da corrupziun tranter il 2010 ed il 2016. Marin che ha 85 onns duai avair acceptà 6,5 milliuns francs, Napout è 59 onns vegl e duai avair retschet 10,5 milliuns francs. Persuenter hajan els vendì dretgs da gieus da ballape lucrativs per sponsurs e televisiuns, ad ina firma da marketing.
RR novitads 20:00