Siglir tar il cuntegn

Header

cuntegn

Naziunal/Internaziunal Berna pront per «Le Tour»

Durant trais dis beneventa la chapitala svizra la pli gronda cursa da velo dal mund. La 16avla etappa dal Tour de France 2016 maina da Moirans-en-Montagne a Berna. Suenter in di da paus en la chapitala partan ils bun 200 ciclists la mesemna da Berna direcziun Finhaut-Emosson en il chantun Vallais.

audio
Mezdi: Berna è pront per «Le Tour»
ord Actualitad dals 18.07.2016.
laschar ir. Durada: 4 minutas 56 Secundas.

En l’istorgia da 103 onns Tour de France ha questa cursa gia manà 24 giadas sur ils cunfins da la Svizra. Quest onn sa tschenta il tour però l'emprima giada en la chapitala svizra. Berna dastga sa preschentar durant bun trais dis al mund da sport, in grond mund – bun 12 milliuns aspectaturas ed aspectaturs en 190 pajais persequiteschan di per il Tour de France via televisiun. Betg cumprendis èn ils tschients millis fans mintgamai a l'ur da la via.

Sfida per Berna

Per la citad da Berna èsi in’organisaziun gigantica. Il Tour de France è ina cursa da tut in’autra dimensiun ch’il Tour de Suisse. Ils ciclists vegnan accumpagnads da passa 2’500 autos accreditads cun bun 4’000 persunas, da quai circa 2’000 schurnalists.

Plan etappas svizras al Tour de France 2016.
Legenda: Plan etappas svizras al Tour de France 2016. Keystone

209 km – paus – 184,5 km

La 16avla etappa dal Tour de France maina il glindesdi da Moirans-en-Montagne, in lieu franzos en la vischinanza da Genevra, a Berna, quai sur 209 kilometers. Il mardi è il segund di da paus per ils ciclists dal Tour de France 2016. La mesemna enturn mezdi partan ils ciclists da Berna visavi il Stade de Suisse en direcziun Finhaut-Emosson en il Vallais. Questa emprima etappa en las Alps è 184,5 kilometers lunga.

Gronds custs per segirtad

Il spectacul dal Tour de Fance a Berna procura er per gronds custs. Sulet la citad da Berna prenda ord cassa in mez milliun francs per questa concurrenza. Plinavant sustegn chantun da Berna quest eveniment cun 1,7 milliuns francs. Bler dals daners vegn duvrà per la segirtad. Quella ha quest onn dapertut prioritad suenter ils attentats en la Frantscha. Che tut grategia sco giavischà e senza incaps, da quai fan attenziun la polizia, la protecziun civila, schuldada ed era blers voluntaris.

RR actualitad 08:00

Artitgels legids il pli savens