Siglir tar il cuntegn

Header

cuntegn

Naziunal/Internaziunal Beat Feuz procura per finiziun da siemi

Il final da la cuppa mundiala da skis a San Murezzan ha cumenzà grondius dal punct da vista svizzer. Il Bernais Beat Feuz ha triumfà ed uschia procurà per l’emprima victoria svizra en ina cursa rapida dapi il 2014. La culla pitschna da cristal gudogna il Talian Peter Fill.

Il podest

  • 1. Beat Feuz (SUI)
  • 2. Steven Nyman (USA) + 0,08 secundas
  • 3. Erik Guay (CAN) + 0,54 secundas

audio
Saira: Triumf per Beat Feuz en la cursa rapida a San Murezzan
ord Actualitad dals 16.03.2016.
laschar ir. Durada: 1 minuta 59 Secundas.

Tge per in di per Beat Feuz! Quatter onns suenter sia davosa victoria en la cuppa mundiala stat il skiunz da l’Emmental puspè sisum il podest. Feuz ha sco gia en il trenament persvadì sin la pista Corviglia e la finala triumfà cun in avantatg da be 8 tschientavels sin l’American Steven Nyman. Igl è la 6avla victoria da la cuppa mundiala per Feuz ed il punct culminant da la stagiun. Beat Feuz aveva dà pir il schaner a Wengen ses comeback suenter ina lunga pausa da blessura.

Fill va per la culla da cristal

In grond di èsi er per Peter Fill. Il Talian vegn 10avel en la cursa rapida a San Murezzan e gudogna uschia la culla pitschna da cristal per il meglier skiunz en questa disciplina. Igl è il punct culminant da la carriera per il skiunz da 33 onns.

Peter Fill gudogna culla da cristal.
Legenda: Cristal per Peter Fill, il meglier skiunz da la stagiun en la disciplina cursa rapida Keystone

Peter Fill ha gudagnà quest onn il classicher sin la Streif a Kitzbühel ed ha dentant er profità che ses concurrent, il Norvegiais Aksel Svindal, è cupitgà a Kitzbühel ed uschia stuì terminar la stagiun. Fill è l’emprim skiunz talian che gudogna la culla da cristal en la cursa rapida. La finala ha el 26 puncts dapli sin il conto che Svindal e 30 puncts dapli ch'il Norvegiais Kjetil Jansrud ed il Talian Dominik Paris (ITA).

Ils Svizzers

  • 1. Beat Feuz
  • 2. Carlo Janka + 1,14 secundas

Sper Feuz è Carlo Janka stà il sulet Svizzer a la partenza. Il skiunz da Sursaissa n’ha betg dal tut pudì persvader ed ha la finala stuì sa cuntentar cun il 8avel plaz. Betg in mal resultat, dentant suenter ses bun trenament ha Janka siemià dal podest.

RR novitads 12:00

Artitgels legids il pli savens