Siglir tar il cuntegn

Header

Navigaziun

Il giugader dal FC Porto Jackson Martinez.
Legenda: Il FC Basilea sto dar adatg dal giugadere Jackson Martinez. Keystone
cuntegn

Naziunal/Internaziunal Basilea retschaiva il campiun da transfers

Sin in’autezza cun Real Madrid, FC Barcelona u Bayern München. Il FC Basilea gioga questa saira l’8avelfinal da la Champions League. Il campiun svizzer frunta sin il club portugais da Porto.

Porto n’è betg in’equipa cun superstars senza fin, sco Real Madrid, FC Barcelona u Bayern München. Ma tuttina, l’equipa da Porto ha ina valur ch’è 4 giadas pli auta che quella da Basilea. Spezialmain sin in giugader sto il FC Basilea far attent. Numnadamain sin Jackson Martinez. 16 gols en 21 gieus ha il Columbian sajettà questa stagiun en la liga portugaisa, ed en la Champions League ha el sajettà 5 gols en 5 gieus.

Era Basilea è campiun da transfers

Il Club da ballape da Basilea vala sco campiun svizzer en far transfers. Els èn buns da cumprar giugaders favuraivels e silsuenter da vender quels per in aut pretsch.

Il FC Porto vegn savens era numnà il campiun mundial da transfers. I na dat numnadamain betg in club che fa uschè blers daners cun transfers.

Cun la strategia da cumprar giugaders favuraivels e vender char els ha il FC Porto gudagnà passa 300 milliuns euros ils davos bun 10 onns.