Siglir tar il cuntegn
cuntegn

Naziunal/Internaziunal Australian Open: Bacsinszky vinavant, Bencic out

La giugadra da tennis vadaisa Timea Bacsinszky ha stuì cumbatter fitg. La finala cuntanscha ella la runda dus a Melbourne suenter batter la Taliana Camila Giorgi cun 6:4, 3:6 e 7:5. Belinda Bencic sto però succumber a Serena Williams en l’emprima runda dals Australian Open, quai cun 4:6 e 3:6.

La giugadra da tennis svizra Timea Bacsinszky.
Legenda: Gudagnà, ma cun fadia. Timea Bacsinszky. Keystone

L’emprim obstachel è surmuntà: Timea Bacsinszky cuntanscha als Australian Open la segunda runda. La Vadaisa da 27 onns è sa profilada suenter bun duas uras e mez cunter Camila Giorgi da l’Italia en in flaivel gieu.

Per Bacsinszky èsi stà l’emprim gieu en l’onn nov suenter ch’ella aveva stuì spustar il start da la stagiun a Shenzhen pervi d’ina blessura da la musculatura dal venter.

En la segunda runda frunta Bacsinszky la gievgia sin Danka Kovinic, il numer 68 dal mund. Cunter la giuvna da 22 onns dal Montenegro n’ha la Vadaisa fin uss anc mai giugà.

Williams pli concentrada che Bencic

Grazia a ses spiert da cumbat ha Bencic evità in pli grond debachel cunter Williams ch’ha gia gudagnà sis giadas ils Australian Open. Durant sia pli ferma fasa ha il numer 59 dal mund scursanì en il segund set da 0:5 sin 3:5. Dapli spazi n’ha Serena Williams betg laschà a la Svizra. Lezza è sa mussada fermamain meglierada e fitg concentrada.

Belinda Bencic n'ha betg gì schanza cunter Serena Williams.
Legenda: Nagina fortuna per la giuvna giugadra da tennis svizra. Belinda Bencic n'ha betg gì schanza cunter Serena Williams. Keystone

La terrada tar radund 30 grads en la grond’Arena Rod Laver n’è per Bencic nagina raschun da metter en dumonda tut. Tuttina spetgan potenzialmain impurtantas e grevas emnas sin la giuvna da 19 onns ch’era avant 11 mais anc il numer 7 dal mund. En la rangaziun WTA vegn ella a perder ulteriuras 20 posiziuns.

RR novitads 06:00 / 10:00