Orlik è uschia successur da Christian Stucki ch’era l’onn passà daventà lutgader da l’onn suenter ch’il retg Matthias Sempach aveva gudagnà trais giadas en seria quest titel.
Ina stagiun plain success
Armon Orlik ha merità il titel sco lutgader da l’onn grazia ad in’enorma constanza durant la stagiun nua ch’el ha gudagnà gist sis festas da lutga.
Plinavant ha el demonstrà sia classa a la festa federala da lutga ad Estavayer: Là ha el cuntanschì la lutga finala, la quala el ha dentant pers cunter il Bernais Matthias Glarner.
Premis per il pli grond sigl e per il meglier giuven
Armon Orlik terminescha la stagiun sco numer 1. El ha en tut gudagnà 51 puncts, 10 puncts dapli che Matthias Sempach e 14 puncts dapli che Christian Schuler. La laudatio per Orlik a la notg da lutga a Rheinfelden ha tegnì ses trenader ed anteriur lutgader Reto Attenhofer da Flem.
Ulteriurs premis èn ids al Bernais Remo Käser. El è il lutgader ch’ha durant il 2016 fatg il pli grond sigl enavon. Samuel Giger dal chantun Turgovia è vegnì onurà sco meglier giuven da l’onn. Giger, ch’ha be 18 onns, è schizunt stà classà sco in dals tschintg megliers lutgaders insumma da l’ultima stagiun.
RR Sportissimo 17:00
