Siglir tar il cuntegn

Header

cuntegn

Naziunal/Internaziunal Ammann e Daschwanden na persvadan betg

Simon Ammann e Gregor Daschwanden n'han betg pudì persvader a la concurrenza da siglir cun skis ad Engelberg.

Els han vulì far oz in plaschair als fans svizzers, mo quai n’è betg propi grategià. A la concurrenza da siglir cun skis ad Engelberg han ils Svizzers stuì magunar ina terrada. Simon Ammann è la finala anc stà il meglier Svizzer sco 21avel. Gregor Deschwanden ha stuì sa cuntentar cun il 30avel plaz.

Nagina schanza da tegnair pitg

A Simon Ammann, il dubel dubel champiun olimpic, n’èsi insumma betg ì sco giavischà. El è siglì 128 e 125 meters ed ina giada dapli n’ha el betg fatg buna figura tar il sa tschentar, uschia ch'el ha gì nagina schanza da tegnair pitg cun ils megliers.

Anc mender èsi ì a Gregor Deschwanden che aveva avant ina emna anc persvas cun il 7avel plaz a Nischni Tagil. Oz è el sa qualifitgà sco 24avel per il segund sigl. Là è el dentant siglì il pli pauc lunsch da tuts, uschia ch'el è crudà enavos sin il 30avel plaz. Ils dus ulteriurs Svizzers, Killian Peier e Luca Egloff han munchentà la qualificaziun per il segund sigl.

Frars Prevs èn ina classa per sasez

Ina classa per sasez èn stads oz ad Engelberg ils dus frars Prevs da la Slovenia. Peter Prevc ha dominà la concurrenza e gudagnà cun bunamain 14 puncts avantatg sin ses frar Domen Prevc. Per Domen Prevc èsi l’emprim plaz da podest insumma en sia carriera. Cumplettà il podest sco terz ha il Giapunais Noriaki Kasai.

Damaun stat la segunda concurrenza da siglir cun skis sin il program ad Engelberg. Per ils frars Slovens vali da confermar il success dad oz e per ils Svizzers èsi la schanza da far meglier.

Sportissimo 17:00

Artitgels legids il pli savens