Siglir tar il cuntegn

Header

cuntegn

Naziunal/Internaziunal Ad YB gartegia la sensaziun

Ils Young Boys han cuntanschì quai che nagin n’ha spetgà dad els. Il club bernais è sa qualifitgà per ils playoffs da la Champions League.

L’emprim gieu cunter il club ucranais Schachtar Donezk avevan ils Young Boys pers avant in’emna cun 0:2. La mesemna saira han ils Bernais dentant pudì reagir cunter ils favurits ord l’Ucraina, e medemamain sajettar dus gols.

Cunzunt en la segunda mesadad ha YB mussà dapli en l’offensiva. E duas bellas acziuns ha Yuya Kubo mintgamai pudì finir cun sajettar in gol al 2:0. En la prolungaziun è Schachtar Donezk lura stà pli ferm ch’ils Bernais, gols n’hai dentant dà nagins. Il sajettar penaltis ha YB lura gudagnà cun 4:2.

Ils Bernais pon sa legrar sin in adversari attractiv

Cun sa qualifitgar per ils playoffs da la Champions League, vegn YB en mintga cas a pudair sa participar a la fasa da gruppa da la Europa League. Pertge da gudagnar en ils playoffs da la Champions League è strusch pussaivel per ils Bernais, ils adversaris pussaivels èn numnadamain Manchester City, Porto, Villareal, Ajax Amsterdam e Borussia Mönchengladbach. Tratg la sort vegn venderdi.

RR novitads 23:00

Artitgels legids il pli savens