Siglir tar il cuntegn
cuntegn

Naziunal/Internaziunal A l'attatga – e turnar cun trais puncts

5 gieus – 5 victorias. La qualificaziun per il proxim campiunadi mundial da ballape il 2018 en la Russia va enfin ussa sco giavischà per la naziunala Svizra. Da giugar èn dentant anc ina giada tschintg gieus, e la Svizra vul restar sin questa via da success.

En il proxim gieu da qualificaziun frunta l’equipa da Vladimir Petkovic il venderdi a Torshavn sin las Inslas Feroe, il numer 80 da la rangaziun mundiala da la FIFA. Cun bun 50’000 abitantas ha il pajais dal Nord betg bler dapli abitants che Cuira e Domat ensemen. E sin las Inslas Feroe vivan il dubel nursas che persunas.

Tuttina spetga sin la Svizra ina dira nusch, er perquai che las Inslas Feroe dattan in gieu fitg defensiv e discplinà.

En l’emprim duel en questa qualificaziun per il proxim grond turnier aveva la Svizra battì il november las Inslas Feroe a chasa cun 2:0.

Eren Derdiyok ed il capitani Stephan Lichtsteiner avevan sajettà ils gols a Lucerna. Er a Torshavn, la citad principala da las Inslas Feroe, quinta sulet ina victoria. Tut igl auter fiss ina trumpada ed ina terrada sin via al campiunadi mundial en Russia.

A Petkovic mancan ils defensurs centrals

Rumpatesta al trenader naziunal Vladimir Petkovic fa il mument sia defensiun centrala. Nico Elvedi ha stuì dar forfait per quest gieu da qualificaziun pervia da problems cun ina coissa, Fabian Schär è serrà, Léo Lacroix blessà e Johan Djourou n’ha para er betg dad esser top fit.

Petkovic ha stuì reagir sin questa miseria ed ha tranter auter nominà per l’emprima gia Manuel Akanji, il giuven talent dal FC Basilea.

RR actualitad 08:10