Siglir tar il cuntegn

Naziunal/Internaziunal 4 trumfs svizzers a l'US Open

Roger Federer, Stan Wawrinka, Belinda Bencic e Timea Bacsinszky. Quai il quartet che preschenta la Svizra al davos Grand Slam da tennis da l’onn, l’US Open a Flushing Meadows a New York.

Il stadion Arthur Ashe a Flushing Meadows a New York
Legenda: L'Arthur Ashe Stadium a Flushing Meadows a New York è il pli grond stadion da tennis dal mund. Reuters

Tuts quatter han giugà fin uss ina grondiusa stagiun e scrit vinavant l’istorgia da tennis svizra. Mintgin dad els ha procurà il 2015 per intgins puncts culminants. Roger Federer ha gudagnà quest onn gist tschintg turniers fin oz, tranter auter il turnier da tennis a Cincinnati, l’emprova generala per l’US Open.

Trais turniers ha Stan Wawrinka gudagnà. Ses grond success ha el festivà al French Open cun la victoria en il final cunter Novak Djokovic.

Belinda Bencic ha gudagnà mez avust il turnier da tennis a Toronto, quai cun batter là gist quatter giugadras dals top 10 dal mund, tranter auter er il numer 1 Serena Williams.

E Timea Bacsinszky ha gudagnà l’entschatta da l’onn dus turniers ed uschia mussà ch’ella è buna da tegnair pitg cun las meglras.

Federer vul ses 18avel titel da Grand Slam

Tranter ils topfavurits sin il titel a New York tutga ina gia dapli Roger Federer. L’actual numer 2 dal mund ha gudagnà tschintg giadas en seria quest turnier, quai tranter il 2004 ed il 2008. Dapi lura è el dentant adina vegnì franà d’in concurrent, savens da Novak Djokovic.

Dacurt a Cincinnati ha Federer battì Djokovic en il final ed uschia suttastritgà sias ambiziuns da triumfar per la 6avla giada a New York. I fiss er il 18avel titel da Grand Slam da sia carriera. Il davos turnier da Grand Slam ha Federer gudagnà il 2012 a Wimbledon.

Roger Federer cumenza l’US Open encunter l’Argentin Leonardo Mayer. Stan Wawrinka ch’è classà sco numer 5 a New York dat ses emprim gieu encunter il Spagnol Albert Ramos. Belinda Bencic frunta gia l’emprim di dal turnier sin la Bulgara Sesil Karatantschewa e Timea Bacsinszky sa duellescha cun Barbora Zahlavova da la Tschechia.