Il numer in dal mund Novak Djokovic po uschia festivar sia 5avla victoria sin il pastget a Wimbledon – ed il 16avel titel da Grand Slam en tut. En il 5avel set n'ha Roger Federer betg pudì nizzegiar duas ballas da matsch suenter il break tar il 8:7. Enstagl ha el era pers il terz tiebreak dal di, ch'è vegnì en funcziun tar il 12:12 tenor las novas reglas.
Cun 4 uras e 57 minutas èsi stà il pli lung final da l'istorgia da Wimbledon. Il 2008 avevan Rafael Nadal e Roger Federer cumbattì durant 4 uras e 48 minutas - è lura aveva Federer pers.
Suenter la partida ha Federer ditg cun in surrir:
Jau vi empruvar dad emblidar quai. Igl è stà ina partida narra. Igl è stà grondius. Jau sper da dar vinavant ad autra glieud – da crair vi da la schanza ch'i n'è anc betg finì cun 37 onns.
In final per l'istorgia
Il final a Wimbledon 2019 vegn a restar en memoria a tut ils fans da tennis. Igl è stà grondiusa reclama per il sport. Novak Djokovic sco è Roger Federer han mussà daco ch’els tutgan tar ils pli gronds giugaders en l'istorgia da tennis. Il final pon ins cumparegliar cun il final a Wimbledon 2008, cura che Roger Federer aveva pers cunter Rafael Nadal en 5sets, era en in gieu dramatic.
Federer, Djokovic e Nadal
Dal trio da legendas ha Roger Federer anc adina ils pli blers titels da Grand Slam, numnadamain 20. Rafael Nadal cun 18 e Novak Djokovic cun 16 titels Grand Slam vegnan dentant pli e pli manaivel al Svizzer. Il trio ha dominà il sport da tennis durant ils ultims onns. E sch’ins ha guardà il turnier da Wimbledon, sche lura èsi grev da s’imaginar che quai vegn a sa midar il proxim temp.
RR novitads 21:00