Igl è stà ina fin d'emna d'emblidar per Tavau. Suenter la terrada il venderdi cunter Ajoie, han ils Grischuns pers la sonda il duel a la testa cunter Fribourg-Gottéron. Tavau è da nov sin plazza 2 da la tabella cun dus puncts pli pauc che Friburg.
Emprim terz
- 9' Chris DiDomenico 0:1
Il HCD ha atgnamain mussà in bun emprem terz, ha gì bler il puck ed uschia blers sajets sin gol. Il puck n’ha dentant betg chattà la via en la rait da Fribourg-Gottéron, malgrà 17 sajets sin il gol da Reto Berra.
Il sulet gol en l’emprim terz ha il topscorer da Friburg, Chris DiDomenico sajettà en la 9avla minuta cun in bel sajet en la crusch. Quai suenter in sbagl dal defensur Davyd Barandun.
Segund terz
- Nagins gols
En il segund terz ha il schlantsch mancà tar omaduas equipas. Schanzas da gol èn stadas raras. Sulettamain en ina fasa da powerplay curt avant la segunda pausa ha è il HCD vegnì da far squitsch sin il gol da Reto Berra. Friburg ha mussà defensiv in ferm terz e tegnì davent ils giugaders da Tavau da la zona da privel.
Ultim terz
- 42' Killian Mottet (Philippe Furrer) 0:2
Suenter in sbagl dal goli da Tavau Sandro Aeschlimann ha Friburg sajettà suenter mo 90 secundas en l'ultim terz il 2:0 per l'osp. Ord in anghel git ha el stuì schar mitschar in puck ella rait.
La reacziun dal HCD è stada vehementa sin quest segund gol. Ils Grischuns han fatg grond squitsch sin il gol da Fribourg-Gottéron, dentant senza success. A la fin dal gieu ha Tavau gì sajettà 45 pucks sin Reto Berra, nagin ha dentant chattà la via en il gol. Ils draguns da Friburg han cun 26 sajetts fatg dus gols.
Ils ulteriurs resultats
- Ambri-Piotta – Genevra-Servette 2:3
- SC Berna – ZSC Lions 6:1
- Losanna – Lugano 4:8
- SCL Tigers – HC Ajoire 8:2
- Zug – Bienna 4:3
