Jolanda Neff ha mussà ina cursa perfetga e gia baud pudì sa distanziar da l'entira concurrenza. Ella è vegnida il meglier a frida cun il percurs fitg tecnic a Tokio e la finala triumfà cun in avantatg da passa ina minuta sin sias cumpatriotas Sina Frei e Linda Indergand.
Per Jolanda Neff èsi l’encurunaziun d'ina grondiusa carriera, quai cun 28 onns. Cun quest titel olimpic ha ella gudagnà il sulet titel che mancava anc en ses palmarès, e quai suenter dus onns nua ch'ella ha cumbattì encunter diversas blessuras. Avant bun in onn e mez era Neff cupitgada fitg en il trenament en ils Stadis Unids, avant sis emnas aveva ella plinavant rut in maun.
In grond success èsi er per Sina Frei che gudogna argient tar ses emprims gieus olimpics insumma. Ed er per Linda Indergand dal chantun Uri è la medaglia da bronz il pli grond success da la carriera. Per l'entir trio èsi la pajaglia per las tschients e millis uras lavur e trenament.
Trumpada per las favuritas franzosas
Ina dira frida han las Franzosas stuì magunar en la cursa olimpica a Tokio. Loana Lecomte ch’aveva gudagnà tut las cursas da la cuppa mundiala da la stagiun è vegnida sisavla. Er la segunda favurita, la campiunessa mundiala Pauline Ferrand-Prévot n'ha betg persvadì. Suenter in bun cumenzament è la Franzosa crudada enavos sin il 9avel plaz.
