El n'haja betg prendì sapientivamain doping, di Matthias Flückiger stgars trais emnas suenter ch'el è vegnì disqualifitgà pervi d'ina controlla da doping.
Ils 5 da zercladur era vegnì constatà tar Flückiger ina minima quantitad da Zeranol e sinaquai n'ha el betg dastgà sa participar al campiunadi mundial. Ils 0,3 nanograms per mililiter èn 17 giadas pli pauc che la limita per ina eventuala contaminaziun chaschunada cun mangiar charn.
Renfatschas vers antidoping
Per Flückiger e ses team èsi cler: Sin basa da la quantitad ch'è vegnida constatada saja da discurrer d'in resultat «atipic» e betg «positiv». Quai prevesian las instrucziuns da la WADA, l'Agentura mundiala cunter doping.
Precis questas instrucziuns haja la WADA relaschà per evitar che sportistas e sportists vegnian condemnads prematurmain. Deplorablamain n'haja l'autoritad antidoping «Swiss Sport Integrity» betg resguardà questas reglas, hai num en ina communicaziun da medias.
Matthias Flückiger survegn uss invista en las actas ed el ha er pretendì tut ils documents dal labor a Losanna. Ad interim èn tut ils termins abolids – er quel per ina prova B.
Flückiger testà positiv
Swiss Cycling era vegnì infurmà da Swiss Sport Integrity a l'ur dal campiunadi europeic da quest surpassament encunter las directivas d'antidoping e sinaquai era Flückiger vegnì serrà provisoricamain.
«Nus essan tuts schoccads», uschia Thomas Peter, il mainafatschenta da la Federaziun svizra Swiss Cycling. «Jau na sai gnanc tge substanza che quai è ed en tge medicaments che zeranol vegn avant.»
Mathias Flückiger è vice-campiun olimpic da Tokio e victur dal classament general da la cuppa mundiala l'onn 2021. El è vegnì suspendì provisoricamain da ses team «Thömus maxon Swiss Mountain Bike Racing» suenter ch'el è vegnì testà positiv sin doping al campiunadi svizzer da cross-country l'entschatta zercladur a Leysin. Il Lumnezian Vital Albin è er en l'equipa da Flückiger.
Or da l'archiv
