La decisiun dal Cussegl federal è stà in grond levgiament per bleras uniuns e clubs da sport. Davent dals 6 da zercladur san ins turnar enavos en il trot sco avant la crisa da corona. Clubs da ballape u da hockey sin glatsch dastgan, per exempel, puspè trenar senza restricziuns. Actualmain èn mo trenaments en gruppas da tschintg lubids. Stan actual san ils campiunadis regiunals da ballape cumenzar l'avust a moda normala.
Il Cussegl federal ha concret decis:
- Occurenzas da sport cun fin 300 persunas èn lubidas davent dals 6 da zercladur.
- Davart occurenzas cun fin 1000 persunas vegn decis ils 24 da zercladur.
- Sports cun in stretg contact corporal (lutgar, boxar...) restan probablamain scumandads fin ils 6 da fanadur.
- Occurenzas da sport cun var 1000 persunas restan scumandadas fin la fin d'avust.
Co vinavant en la Super League?
Occurenzas grondas restan vinavant scumandadas. Uschia vegnan er ils stadions da ballape a restar per gronda part vids sch'il campiunadi cumenza puspè. La liga s'inscuntra venderdi per discutar co vinavant.