Siglir tar il cuntegn

Header

audio
Festa federala da lutga – Roman Dobler ha analisà l'emprim di
Or da Sportissimo dals 24.08.2019.
laschar ir. Durada: 8 minutas 56 Secundas.
cuntegn

Festa federala da lutga L'emprim di da la Festa federala da lutga

En quest artitgel chattais Vus tut las intervistas ed analisas da l'emprim di.

L'emprim di en paucas frasas

  • Armon Orlik vala ensemen cun Christian Stucki e Joel Wicki sco topfavurit per daventar il nov retg.
  • Ils auters favurits sco Samuel Giger, Matthias Glarner e Nick Apliger n'han naginas schanzas pli da cumbatter en la lutga finala.
  • Ils ulteriurs lutgaders grischuns n'han betg persvas. Quants dad els ch'èn damaun anc da la partida n'è anc betg cler.
  • En la 5avla lutga da damaun marvegl fruntan Joel Wicki e Christian Stucki in sin l'auter. Armon Orlik frunta sin Kilian Wenger ch'è daventà retg il 2010 a Frauenfeld.

Il ticker è a fin

  • 18:21

    A revair e fin damaun!

    Nus rapportain damaun puspè da la Festa federala da lutga.

    Grazia fitg ed a Vus ina bella saira!

    Per Vus a Zug da la partida: Roman Dobler ed Andreas Wieland.
    Legenda: Roman Dobler ed Andreas Wieland rapportan per Vus live da Zug. RTR, Roman Dobler
  • 18:08

    La testa dal classament suenter l’emprim di

    Trais lutgaders èn cun 39,75 puncts sin plaz in. Igl è probabel ch'in dad els daventa damaun il nov retg dals lutgaders.

    • Armon Orlik
    • Christian Stucki
    • Joel Wicki

    Sin plaz dus cun 39,25 puncts sa tschenta Marcel Bieri. Sin plaz trais cun 38,75 puncts è Fabian Staudenmann.

  • 17:59

    Classament dals lutgaders grischuns

    • Plazza 12. Mike Peng, 36,50
    • Plazza 14. Ursin Battaglia, 36,00
    • Plazza 15. Roman Hochholdinger, 35,75
    • Plazza 15. Christian Biäsch, 35,75
    • Plazza 16. Mauro Gartmann, 35,50
    • Plazza 17. Marc Jörger, 35,25
  • 17:44

    Il trenader dals Grischuns en l'intervista

    Armon Orlik va en il cumbat per il titel sco retg dals lutgaders. Per ina gronda part dals auters sis Grischuns è la festa dentant schon ida a fin questa saira.

    Andreas Wieland ha discurrì cun il trenader dals lutgaders grischuns, cun Reto Attenhofer.

    audio
    Il trenader Reto Attenhofer suenter l'emprim di da la Festa da lutga
    ord Sportissimo dals 24.08.2019.
    laschar ir. Durada: 2 minutas 10 Secundas.
  • 17:31

    Quatter lutgas, quatter victorias

    Il favurit e grond trumf grischun, Armon Orlik, ha lantschà a moda suverana la Festa federala a Zug. En l’emprima lutga ha el gist gudagnà cunter il retg actual da lutga Matthias Glarner. Silsuenter ha Armon Orlik anc mess en dies Florian Gnägi, Stefan Arnold ed il davos Patrick Schenk. In di perfetg – quai di el sez en l’intervista cun Andreas Wieland.

    audio
    Intervista cun Armon Orlik suenter l'emprim di
    ord Sportissimo dals 24.08.2019.
    laschar ir. Durada: 51 Secundas.
  • 17:14

    Ulteriurs Grischuns na persvadan betg

    En la quarta runda fa Christian Biäsch (Tavau Sertig) in pari cunter Jacob Schallberger. Tuts dus survegnan 8,75 puncts.

    Mauro Gartmann (Flerden) perda cunter Simon Mathys Borcard. Gartmann fa 8,5 puncts. Il medem resultat fa Ursin Battaglia (Almens) cunter Mickaël Matthey.

  • 17:07

    Orlik persvada, Wicki brigliescha

    Joel Wicki haja mussà las meglras prestaziuns. El ha gudagnà tut ils duels, mai ha el duvrà perquai dapli ch'ina minuta e mez.

    Er Armon Orlik haja en la quarta lutga mussà ina buna prestaziun. Suenter in duel captivant da var quatter minutas cunter Patrick Schenk ha il Grischun per la terza giada pudì far 10 puncts.

    La bilantscha da la quarta runda da Roman Dobler.

    audio
    Bilantscha da la quarta runda
    ord Novitads dals 24.08.2019.
    laschar ir. Durada: 1 minuta 34 Secundas.
  • 16:58

    Ils ulteriurs resultats dals favurits

    • Thomas Kropf gudogna cunter Nick Alpiger
    • Christian Stucki gudogna cunter Matthias Herger
    • Joel Wicki gudogna cunter Domenic Schneider
  • 16:53

    Armon Orlik gudogna er la quarta lutga

    Il lutgader da Maiavilla fa puspè 10 puncts. Quai cunter Patrick Schenk. Cun quai ha Orlik gudagnà tut las quatter lutgas.

  • 16:37

    Mo pli la lutga en il chau

    Avant in duel è Armon Orlik bunamain sco en in tunnel. El sa focusescha uschè ferm, ch'el emblida bunamain tut quai che capita enturn el. Avant la terza lutga na bada el gnanca ch'in da ses fans avess gugent in autogram.

    video
    Armon Orlik en il tunnel da concentraziun
    Or da Giuventetgna dals 24.08.2019.
    laschar ir. Durada: 20 Secundas.
  • 16:35

    Uss èsi or: Ils duels dals topfavurits

    • Nick Alpiger cunter Thomas Kropf
    • Matthias Herger cunter Christian Stucki
    • Armon Orlik cunter Patrick Schenk
    • Domenic Schneider cunter Joel Wicki
  • 16:28

    Sin tgi frunta Armon Orlik?

    Sin tgi ch'ils favurits sco Armon Orlik, Christian Stucki u Joel Wicki fruntan en la quarta lutga n'è anc betg cler. La repartiziun da mintga runda vegn fatga d'in pitschen comité. Els na spetgan dentant betg adina fin ch'ina runda è a fin. Els cumenzan schon suenter ils emprims duels a partir si ils lutgaders. Uschia capita, che singuls fan la quarta lutga entant ch'auters na san betg sin tgi ch'els fruntan.

    Comité.
    Legenda: Samuel Feller (en il center) è il respunsabel principal per la repartiziun. Keystone
  • 16:19

    La runda decisiva

    Suenter la quarta runda crodan or ils lutgaders cun ils pli paucs puncts. Tar ina Festa federala èn quai per regla circa in terz dals lutgaders, pia var 70 dad els. Tar la lutga po mintga quart punct esser decisiv – la quarta runda è per intgins dad els l’ultima schanza per dar anc ina giada tut.

  • 15:49

    Grischuns han entant pauc success en la quarta lutga

    Roman Hochholdinger (Favugn) perda cunter Benji von Ah. El fa 8,5 puncts. Il medem resultat fa Mike Peng (Malix) encunter Primin Reichmuth.

    Er Marc Jörger (Domat) perda sia quarta lutga. En il duel encunter Sven Lang ha il Grischun fatg 8,75 puncts.

  • 15:33

    Per tranteren: in pèr fatgs per blagar

    L’arena da la Festa federala da lutga a Zug è la pli gronda arena temporala dal mund – quai almain tenor indicaziuns dals organisaturs. Ella porscha sezs per 56’500 persunas ed ha in diameter da 270 meters. Per construir ella ha ins duvrà 3’000 tonnas material.

    Er la plazza da lutga è impressiunanta. Cun 15’000 meters quadrat è ella dubel uschè gronda sco la plazza da ballape dal St. Jakob-Park a Basilea.

    L'arena da lutga.
    Legenda: L'arena da la Festa federala da lutga. Keystone
  • 15:24

    Ils resultats dals ulteriurs Grischuns

    En la terza runda gudogna Mike Peng (Malix) cunter Adrian Walther. Peng survegn 9,75 puncts.

    Mauro Gartmann (Flerden) perda cunter Johann Borcard. Gartmann ha fatg 8,5 puncts. Er Ursin Battaglia (Almens) perda sia terza lutga. Cunter Konrad Steffen fa el 8,75 puncts.

  • 15:03

    «Orlik, Stucki e Wicki domineschan»

    Per Matthias Glarner e Samuel Giger è il siemi da daventar retg passà. L'analisa da la terza runda da noss redactur da sport Roman Dobler.

    audio
    Analisa da la terza runda
    ord Novitads dals 24.08.2019.
    laschar ir. Durada: 1 minuta 22 Secundas.
  • 14:43

    Er Stucki e Wicki gudognan

    Christian Stucki fa 10 puncts cunter Werner Suppiger, Joel Wicki gudogna er cun summa maximala cunter Jonas Lengacher.

    Christian Stucki fa 10 puncts encunter Werner Suppiger.
    Legenda: Christian Stucki fa 10 puncts encunter Werner Suppiger. Keystone
  • 14:39

    Terza victoria per Armon Orlik

    El gudogna la terza lutga cunter Stefan Arnold. Per Orlik datti 10 puncts.

  • 14:35

    Per intgins favurits è il siemi da daventar retg passà

    Matthias Glarner ha er pers en la terza runda. Sia bilantscha: Duas terradas, ina giada pari. Cun quai è el or da la cursa per daventar retg. Er per Pirmin Reichmuth na basta probabel betg. El gudogna bain la terza lutga e fa cun quai 9,75 puncts. Per la lutga finala na vegn quai dentant betg a bastar.

    Samuel Giger perda encunter René Suppiger. Quai è sia segunda terrada. Per regla na basta quai betg pli per daventar retg. René Suppiger ha entant mo pers ina da las trais lutgas.

     René Suppiger.
    Legenda: René Suppiger avant ses duel cun Samuel Giger. Keystone

Artitgels legids il pli savens