Il lutgader da Maiavilla Armon Orlik ha mussà durant l'entir di bunas prestaziuns. Quai er en la lutga finala. Là ha el battì suenter ina minuta e mez Michael Bless da l'Appenzell.
Express Orlik ha battì in suenter l'auter en il resgim
Davent da l’entschatta è l'express dad Armon Orlik rudlà fitg bain. Gia l’emprima lutga cunter in dals favurits da la Svizra Centrala Joel Wicki ha Orlik gudagnà. A partir da quel mument era per il meglier lutgader grischun cler: oz savessi gartegiar cun la victoria. Quel sentiment è vegni anc pli ferm cur che Orlik ha gudagnà en la terza lutga cunter il retg federal Kilian Wenger.
Suenter mezdi era fitg ferm
Las trais victorias anc avant mezdi èn stadas la basa per il success dad Armon Orlik. Suenter gentar ha Orlik cuntinuà da gudagnar. L’emprim ha el bittà Michael Bless en il resgim. Curt suenter er Stefan Burkhalter. Era en la lutga finala èsi vegnì tar il duel cunter Michael Bless. Là ha el gudagnà in'ultieriura ga cunter l'Appenzellais.
Segunda victoria dal NOS suenter 2016.
Per la segunda giada gudogna Armon Orlik la pli impurtanta lutga dals lutgaders da la Svizra Nordorientala. Suenter che Orlik ha triumfà l’onn 2016 è el stà l’onn passà en la lutga finala dal NOS a Tavau, ed uss a Herisau gudogna Orlik la festa. La victoria da las ultimas trais ediziuns dal NOS èn uschia adina ida sur il lutgader da Maiavilla.
RR sportissimo 12:00 / 17:00