Carlo Janka è partì en questa davosa cursa cun ina chapellina dad aur. Dad aur è er stada sia carriera. El è il sulet skiunz svizzer dasper Pirmin Zurbriggen ch’ha gudagnà il «triple», vul dir daventà campiun mundial e campiun olimpic e gudagnà il classament general da la cuppa mundiala ed uschia la rucla gronda da cristal.
Quai che resta èn las emoziuns
La davosa cursa da Carlo Janka n’è betg ida sco giavischà, er perquai ch’el ha ristgà insatge cun il material. Janka è partì a la davosa cursa dal Lauberhorn cun in ski vegl ch’ha funcziunà bain en la part sisum, dentant betg pli giudim uschia ch’el è crudà ora. Quai che restan èn dentant las emoziuns. Tut ils collegas han beneventà Janka en l’arrivada cun grond applaus ed in placat cun scrit si; «Danke Janka». Ed a l’ur da la pista è stada l’entira famiglia da Janka che va uss en la bain meritada pensiun da skis. Las proximas cursas, en in’emna a Kitzbühel, vegnia el a persequitar tut pacific a chasa sin canapé avant la televisiun, ha Carlo Janka manegià.
