Suenter che las emprimas cursas da la stagiun a Zermatt èn vegnidas unfrenda da la mancanza da naiv, capita il tun da partenza en la nova stagiun cun las cursas da Lake Louise en il Canada. En l'America dal Nord spetgan las dunnas duas cursas rapidas ed in super-g.
Suter, Gut-Behrami e forsa er Flury
Cun las cursas da spertezza a Lake Louise cumenza puspè il cumbat pe r il titel da la regina da speed. Las campiunessas olimpicas Corinne Suter e Lara Gut-Behrami han segir in pled en chapitel cura ch'i va per la surdada da quest titel. En la sumbriva da las duas leadras da l’equipa svizra emprova la Grischuna Jasmine Flury er da mussar bunas prestaziuns. Cura ch’il circus da skis da las dunnas turna alura per las cursas spertas a San Murezzan tutga er ella tar las victuras. Jasmine Flury aveva gudagnà a San Murezzan sin la pista da la Corviglia sia emprima ed unica cursa da la cuppa mundiala da skis. Las cursas da San Murezzan ed en spezial la regiun da l’Engiadina han ina plazza speziala en ses cor.
