Atgnamain vulevan Giusep Dermon e ses collegas sa participar quest onn a la cursa da 50 km a Sapporo. Pervia da la situaziun da corona èn els lura sa decidids d'organisar ina cursa a Steg en il Principadi da Liechtenstein. Quai sin la loipa da Valüna nua che Giusep Dermon (76) passenta l'enviern bler da ses temp. El ed ina gronda part da sia famiglia èn sa participads sco curriders e curridras.
Anc adina sia passiun
Dumagnar ils 50km n'è betg stà la premissa per sa participar a la cursa populara. Mintgin ha pudì ir quant ch'el u ella ha pudì. Era sch'il passlung è anc adina sia passiun ed el è quatter enfin tschintg giadas per emna sin ils skis, vesa el ussa tut in zichel pli luc che avant 50 onns a Sapporo.
A Sapporo hai jau vulì dar tut quai che miu corp ha pudì. E la fin sun jau era stà cuntent cun la prestaziun.
La fin è el vegnì 26avel. Era quest onn persequitescha Giusep Dermon las cursas als gieus olimpics a Peking. Cunzunt las cursas da passlung e biatlon, di l'um oriund da Mustér. El crititgescha dentant co il sport professiunal saja sa midà dapi ch'el e stà als gieus olimpics. Ils atlets e las atletas sajan be in pitschen numer e na possian betg pli decider sez bler. I saja sa midà bler: Da la preparaziun enfin l'equipament. Giusep Dermon è numnadamain stà a Sapporo sulettamain cun in pèr skis. Quai saja oz auter, di l'um da 76 onns.
Passa 80 participants e participantas
Quatter uras è Giusep Dermon stà dumengia sin loipa. Sch'el haja cuntanschì ils 50km na sappia el betg. Quai na saja dentant era betg d’impurtanza, di el. Tant pli grond plaschair haja el gì che passa 80 persunas sajan sa participadas. Quintà aveva el numnadamain be cun radund 50 persunas.
Uschè ina cursa fiss gea in bel mument da terminar la «carriera». Quai na vegn dentant insumma betg en dumonda per l'anteriur atlet.
Quella cursa è be stada ina pitschna episoda tranteren. Jau vegn a cuntinuar uschè ditg ch'jau vegn anc da star sin ina chomma.
Pia, Giusep Dermon ed il passlung – in'istorgia d'amur che n'è anc betg finida.