Siglir tar il cuntegn

Header

cuntegn

Kilchberger Schwinget Staudenmann, Giger ed Ott gudognan la festa tradiziunala

Tar sia 17avla ediziun po la lutga tradiziunala da Kilchberger festivar preschentar in novum. Samuel Giger, Fabian Staudenmann e Damian Ott: quels trais lutgaders èn a la fin da la lutga ensemen a la testa da la rangaziun è pon uss tuts sa numnar victurs dal Kilchberger.

Gia avant la lutga finala avevan Staudenmann ed Ott fatg il pass sin posiziun in da la rangaziun. Il dominatur da questa stagiun, Samuel Giger, ha en la lutga finala mess il retg da la lutga Kilian Wenger en il resgim ed ha uschia pudì egalisar. Avant la decisiun en la secunda minuta aveva Wenger giu duas giadas la schanza da metter Giger sin il dies.

Sch'i na fiss betg stà la runda finala avess Giger sulettamain survegnì 9,75 puncts per sia victoria cunter Wenger ed avess uschia manchentà la posiziun a la testa. Avant intgins onns ha la Federaziun naziunala dentant decis ch'il victur da lutga finala survegn en mintga cas 10,00 puncts.

Staudenmann aveva avant la 6avla runda tuttina blers puncts sco Wenger e Giger. Ses ultim cumbat cunter Samir Leuppi ha el gudagnà cun metter en dies el – per questa acziun ha el survegnì 10,00 puncts. Ott, ch'ha questa stagiun gia gudagnà duas festas da cranz, era avant l'ultima lutga en la medema situaziun. Er el ha gudagnà suveran cunter Bernhard Kämpf.

Betg da la partida a Kilchberg è stà Armon Orlik. Il meglier lutgader dal Grischun ha da cumbatter cun problems vi dal dies.

RTR novitads 17:00

Artitgels legids il pli savens