Cun il velo da cursa va Matteo Badilatti pir dapi intgins onns. Durant ses studi d’economia ha el en sasez cumenzà cun quest sport. L’emprim mo per avair anc insatge sper il studi. E dapi in per onns sco profi da ciclissem. Sia premiera tar ina «gronda» cursa ha il Grischun gì avant dus onns tar il Tour de Suisse. Lura anc sco part d'ina equipa svizra, quasi ina equipa naziunala. La stagiun passada ha el alura pudì partir a la Vuelta d’España propi cun sia equipa. Quest onn spetga il Giro d’Italia.
Cumenzament difficil dentant cun il leader en il team
L’aura durant l’emprima emna dal Giro d’Italia ha fatg fadia a Matteo Badilatti. Tuttina ha sia equipa Groupama-FDJ pudì gidar ad Attila Valter dad avanzar fin a la testa dal classament general – e quel ha purtà in pèr dis il tricot dal meglier, la Maglia Rosa. Quai dà sa chapescha fiduzia en sai. E cun questa fiduzia cuntinuescha la cursa durant las proximas duas emnas. Valter n'è betg pli a la testa da la cursa, tuttina emprovan sia equipa ed era Matteo Badilatti da sustegnair vinavant el, che para dad avair durant quest Giro las meglras chommas.
Suenter ils emprims dis spetgan uss las muntognas
Durant l’emprima part dal Giro d’Italia han ils profis gia stuì superar in pèr muntognas. La part greva spetga dentant anc sin ils ciclists. Perquai èsi uss impurtant da parter en bain las forzas, da sa recrear uschè bain sco pussaivel e da betg vegnir involvà en crudadas. Quai è il mender tar ina cursa che dura trais emnas e che va sur ventgin etappas. La finamira principala per tuts èsi, dad arrivar ils 30 da matg saun en l’arrivada a Milaun.