Siglir tar il cuntegn

Header

cuntegn

Il siemi dals gieus olimpics Vanessa Bolinger vul ir als gieus olimpics

Da primavaira aveva il goli dal Cdh Engiadina Vanessa Bolinger survegnì la nominaziun per l'equipa naziunala. Pervia ch’il campiunadi mundial è vegnì spustà ha la sportista desistì da quest'aventura. Uss vul ella dentant giugar en il cader da la naziunala che va als gieus olimpics.

En sasez aveva Vanessa Bolinger terminà sia carriera sco giugadra da hockey. Ella ha fatg in viadi dal mund e durant quel ha ella realisà che i valess la paina dad empruvar anc ina giada cun il hockey. A Scuol tar il Cdh Engiadina ha ella survegni la schanza dad empruvar anc ina giada cun ses sport preferì. Lura cura che ella n’ha betg pli cret vidlonder è ella vegnida nominada en il cader da l’equipa naziunala. Sco giuvna aveva Vanessa Bolinger gia purtà il dress da l’equipa naziunala sut 18 onns. La nominaziun en l’equipa naziunala da las dunnas d’elita è dentant stada ina premiera.

Campiunadi mundial spustà e la finala betg participà

Curt avant il termin è il campiunadi mundial da hockey da las dunnas en il Canada vegnì spustà. Vanessa Bolinger aveva organisà tut per pudair ir in mais a questa aventura. Cun il spustament sin l'avust n'èsi per ella dentant betg stà pli pussaivel da far part a quest campiunadi nua che las dunnas svizras èn daventadas quartas. Er il chalender da termins ch'è questa stagiun pulit stetg n'ha betg pussibilità al goli da far part. Uschia ha ella laschà ir questa schanza cun la speranza da giugar en il cader da l’equipa naziunala che va alura als gieus olimpics il 2022 a Beijing.

audio
Vanessa Bolinger vul ir als Gieus Olimpics
03:17 min, Actualitad dals 20.09.2021.
laschar ir. Durada: 03:17 minutas.

Cdh Engiadina e Thurgau Indien Ladies

Durant ils mais da stad ha Vanessa Bolinger anc suttascrit in contract cun l’equipa da la Women’s League, Thurgau Indien Ladies. La Women’s League è la pli auta liga da hockey da las dunnas en Svizra. Quantas partidas che Vanessa Bolinger vegn a dar en la Turgovia n'è anc betg cler. En emprima lingia vul ella restar tar il Cdh Engiadina e dar uschia pli bler sco pussaivel en la segunda liga, dentant er far sias experientschas en la Women’s League. Insatge resta adina tuttina: be cun bunas prestaziuns pon ins as recumandar per l’equipa naziunala.

RTR actualitad 17:00

Artitgels legids il pli savens

Scrollar a sanestra Scrollar a dretga