Aifer da mo 24 uras ha la snowboardista Larissa Gasser fatg tras tut ils stadis da sentiments. Da spira allegria fin tar fitg grond mal e tristezza. L’onn 2017 ha Larissa Gasser da Madulain fatg part als campiunadis mundials da juniors en Tschechia. En la cursa da slalom gigant aveva ella gudagnà la medaglia da bronz. Il di suenter tar la cursa da slalom vuleva ella puspè far il sigl sin il podest. Larissa Gasser è dentant crudada.
L’emprim gnanca badà ch'insatge è auter
Suenter la cupitgada sin il chau n'ha ella l’emprim gnanc badà ch'insatge è auter. Cler, ella aveva mal da la cupitgada, dentant na badava ella betg bler auter. Pir suenter in tschert temp ha la mamma ch'era en l’arrivada da la cursa realisà ch'insatge è auter. Perquai ha quai vulì in tschert temp fin che Larissa Gasser è arrivada en l'ospital. Temp custaivel ch'è uschia ì a perder.
Squass dal tscharvè e donnegià sistem da la gnerva vegetativ
La diagnosa en l'ospital era alura dira. Là han ins vis che Larissa Gasser ha in squass dal tscharvè e problems cun il sistem da la gnerva vegetativ. Quest sistem è responsabel per l’equiliber e tranter auter era per la respiraziun e la digestiun.
Pervia da la ferma crudada ha Larissa Gasser pers la regurdanza. Ella n'enconuscheva betg pli ses frar u ses bab. Ella sa regurdava mo pli da la mamma. Uschia ha cumenzà per la snowboardista il lung viadi enavos. Pass per pass sa regurdava ella puspè vi da ses confamigliars e vi da ses conturn. En numerusas uras da reabilitaziun ha ella puspè survegnì enavos il sentiment per l’equiliber, la coordinaziun e la motorica ch'i vul per ir cun aissa.
La finala ha la giuvna snowboardista cuntanschì il nivel da pli baud. La victoria dal classament general en la cuppa d’Europa da snowboard alpin avant in pèr emnas è la pli gronda paja per tut ils sforz e sacrifizis che Larissa Gasser ha prendì sin ella per turnar sin l’aissa.