Raeto Raffainer, il directur da sport dal SCB, è vegnì elegì da nov en il gremi da l'associaziun. Per ils 7 plaz en il gremi hai dà 18 candidaturas. Sulettamain quatter èn vegnids elegids en l'emprima runda – in da quels è l'um da La Punt. Sper Raffainer èn er vegnids elegids il Finlandais Heikki Hietanen, il Svedais Anders Larsson ed il Russ Pavel Bure.
L'elecziun po legrar Raffainer ch'è er stà directur da sport tar il Club da hockey da Tavau. El aveva avant l'elecziun anc dubis ch'el vegnia er propi elegì. Ils commembers dal IIHF èn dentant stads da l'avis ch'i dovra ina represchentaziun svizra en il gremi. Sin sia lavur tar il SCB n'ha ses nov mandat strusch in'influenza. L'occupaziun per il post munta tenor indicaziuns da Raffainer a radund 15%.
Tardif succeda a Fasel
Luc Tardif ch'è dapi il 2012 en l'executiva ha fatg la cursa encunter il tudestg Franz Reindl. L'elecziun per l'um da 68 onns è crudada cun 67 tar 39 vuschs. A disposiziun per il pli aut post dal hockey internaziunal eran 5 candidats. Tardif, ch'è naschì en il Canada, era in dals gronds favurits per la successiun da René Fasel. Il svizzer è stà dapi 27 onns a la testa. Cun ses 71 onns n'è el betg pli stà a disposiziun per la re-elecziun. Cun l'elecziun da Tardif vegn er Fasel ad esser cuntent, el è stà durant ils ultims onns in dals confidents dal Svizzer.
Il burgais dubel Luc Tardif tutga dapi il 2012 tar l'executiva dal IIHF. Sco junior ha el giugà en il Canada, sco activ en la Belgia e la Frantscha. Suenter ch'el ha terminà sia carriera è el deventà funcziunari. Dapi l'onn 2000 è el stà a la testa da l'Associaziun da hockey franzosa.