Siglir tar il cuntegn

Header

cuntegn

Hockey regiunal EHC San Murezzan gudogna

Partenz-Signuradi sco er San Murezzan gudognan lur gieus ordaifer. Terradas datti per Lai-Valbella ed il Cdh Engiadina.

  • SC Rheintal – Partenz Signuradi 2:3

La partida tranter il SC Rheintal ed il HC Partenz Signuradi ha cumenzà ruassaivel. L'emprim gol è pir crudà en la 38avla minuta, tras ils indigens. En las ultimas minutas dal temp regular ha Partenz Signuradi pudì sajettar dus gols, ed uschia egualisar al 2:2. La prolungaziun è restada senza gols. En il sajettar penaltis ha lura Valentino Cavelti gartegià sco sulet, uschia che Partenz Signuradi ha la finala gudagnà la partida ordaifer.

  • Dielsdorf-Niederhasli – EHC San Murezzan 3:4

La partida tranter Dielsdorf-Niederhasli e San Murezzan ha cumenzà pli viv. Ils giasts da San Murezzan han gia fatg en la 5avla minuta l'emprim gol. Suenter l'emprim terz stevi 1:2. En il segund terz ha San Murezzan fatg in ulteriur gol, ed enfin la fin n'ha Dielsdorf-Niederhasli ch'è sin il penultim plaz da la tabella betg dumagnà d'egualisar.

  • Eisbären Son Gagl – Cdh Engiadina 6:2

L'auter club engiadinais, il Cdh Engiadina sto nudar ina pitra terrada. Cunter l'emprim da la tabella han ils Engiadinais pers cleramain. Gia suenter l'emprim terz eran il Songagliais cun 3:1 en avantatg. En il segund terz n'hai dà nagins gols. En la 49avla minuta han ils Engiadinais bain anc sajettà in gol. Suenter han ils urs da glatsch da Son Gagl però anc marcà trais gols e decis cleramain il gieu en lur favur.

  • Lai-Valbella – EHC Illnau-Effretikon 3:7
  • Lai-Valbella sto acceptar ina terrada a chasa. Suenter l'emprim terz da la partida cunter Illnau-Effretikon steva quai già 1:4. Pir en il davos terz han ils da Lai pudì sajettar dus ulteriurs gols, al 3:6. Per dapli n'hai dentant betg tanschì als Grischuns.

RTR novitads 23:00;

Artitgels legids il pli savens