Siglir tar il cuntegn

Header

cuntegn

Hockey regiunal 2. liga Engiadina batta San Murezzan cun 7:3

Il Cdh Engiadina ha enavos il titel dal retg da hockey en Engiadina. L’equipa da l’Engiadina Bassa ha batti en l’emprim derby da la stagiun il EHC San Murezzan cleramain cun 7:3.

Suenter ina pausa dad in onn hai puspè ina giada dà in derby da hockey en l'Engiadina. E quest derby ha tegnì quai ch'ins spetga dad uschia ina partida. Ditg era il gieu egualisà. Pir durant la davosa quart d'ura è il gieu cupitgà da la vart dal Cdh Engiadina. Fin en la 47avla minuta stevì pari 3:3. Lura è il puck dentant crudà a favur dal Cdh Engiadina e l’equipa da l’Engiadina Bassa ha anc fatg quatter gols.

audio
Engiadina batta San Murezzan cleramain cun 7:3
ord Actualitad dals 18.11.2021.
laschar ir. Durada: 2 minutas 58 Secundas.

Gudench Camichel – um dal gieu

L’emprim derby da hockey da questa stagiun è stà insatge per Gudench Camichel. Il giugader dal Cdh Engiadina ha fatg quatter gols e tar dus ulteriurs gols ha el gì ses bastun en il gieu. Per el è quest derby pelvair stà ina partida perfetga. Ils emprims trais gols ha Camichel fatg, e vitiers anc il 6:3. Sper ils gols che l’attatgader ha pudì far, è era anc stà spezial ch'el ha pudì far quests gols encunter sia anteriura equipa. Trais stagiuns ha Gudench Camichel numnadamain dà en il dress dal EHC San Murezzan.

Victoria impurtanta per la cuntinuaziun dal campiunadi

Il derby engiadinais è vegni en la mesadad dal campiunadi. Suenter ina fasa difficila per il Cdh Engiadina cun tschintg sconfittas en seria è la victoria uss d’enorma impurtanza. Il Cdh Engiadina ha puspè ina giada pudì festivar ina victoria. Grazia a quella ha l’equipa da l’Engiadina Bassa pudì dar giu la laterna cotschna en segunda liga. San Murezzan percunter resta sin plazza sis da la tabella.

RTR actualitad 17:00

Artitgels legids il pli savens