Per Tavau èsi l’emprima terrada encunter l’equipa dal chantun Vad en questa qualificaziun. Ils emprims trais duels aveva il HCD gudagnà. Er en il quart duel hai ditg vis ora bain per il HCD che manava suenter dus terzs meritadamain cun 3:2. Ils gols per Tavau vevan sajettà fin lura Matej Stransky al 1:1 en la 13avla minuta, Raphael Prassl al 2:1 en la 17avla minuta ed Enzo Corvi al 3:2 en la 23avla minuta.
Al cumenzament dal davos terz ha il HCD dà ord ils mauns il gieu. En curt temp ha Losanna sajettà dus gols al 4:3 e silsuenter controllà il gieu fin la fin. Per il HCD èsi ina dira terrada che n’avess betg stuì esser. Ed er en vista ad in plaz da playoff direct èsi trais puncts pers.
Schanza da far meglier survegn il HCD gia questa saira, lura frunta l’equipa dal trenader Christian Wohlwend ordaifer sin il HC Ambri-Piotta. Il gieu cumenza a las 19:45 uras.
Las ulteriuras partidas
- Ajoje perda cunter Zug cun 3:6.
- Berna perda cunter Friburg cun 0:3.
- Bienna perda cunter ils ZSC Lions cun 2:3 suenter sajettar penaltis.
- Ils Lakers gudognan cunter Genevra cun 2:1 suenter sajettar penaltis.
- Ils SCL Tigers perdan cunter Ambri cun 0:4.
En la tabella maina Friburg avant Zug. Tavau è vinavant sin il sisavel plaz.