Sco gia il venderdi passà encunter l’EHC Kloten (7:0) ha il HCD er persvadì encunter il favurit da la Svizra Centrala ed uschia festivà la segunda victoria da campiunadi en questa stagiun.
Per la differenza ha il HCD procurà en il segund terz. Grazia a gols da Valentin Nussbaumer, Magnus Nygren e Dennis Rasmussen en powerplay ha l’equipa da Christian Wohlwend pudì volver il gieu. Suenter l’emprim terz manava numnadamain l’EV Zug cun 2:1. L’emprim gol per il HCD ha sajettà Joakim Nordström en la 6avla minuta al 1:1. Cun il 3:4 ha Zug anc pudì scursanir bun duas minutas avant la fin entras Fabrice Herzog, in gol ch'è però crudà memia tard. Paucas secundas pli tard ha Chris Egli fatg tut cler cun il 5:3 en il gol vit.
Cun questa victoria ha il HCD er pudì far in zic revantscha per la terrada da 0:4 en la seria da playoff mezfinal encunter Zug la stagiun passada. Gia venderdi saira vai vinavant per Tavau, lura frunta il HCD ordaifer sin ils SCL Tigers.
Las ulteriuras partidas
- Ajoie gudogna cunter Berna cun 3:2 suenter prolungaziun.
- Ambri perda cunter Lugano cun 1:4
- Friburg gudogna cunter Kloten cun 9:1
- Genevra gudogna cunter ils SCL Tigers cun 4:2
- Ils SCL Tigers perdan cunter Bienna cun 1:6
- Losanna perda cunter ils Rapperswil-Jona Lakers 0:4
- Bienna cunter ils ZSC Lions cun 1:4
