Il club da hockey da Tavau è partì bain en la partida cunter Langnau. Il patrun da chasa è l’emprim ì en avantatg. Fin in quart’ura avant la fin aveva il HCD augmentà il gieu fin a 4:1. Lura dentant è Langnau turnà cun in culp dubel aifer be paucas secundas en la partida. Suenter ch'il HCD manava il gieu cun trais gols è la partida vegnida anc ina giada stretga. Ed il pli tard cura che Langnau ha egualisà il gieu è stà cler als fans en la halla da glatsch a Tavau: uss vegni grev da tuttina anc ir per la victoria cunter ils Tigers.
Mument per l'equipa bernaisa
L’ultim terz è i exact uschia sco che Langnau vuleva e cun egualisar il gieu suenter l’avantatg da trais gols era il mument cleramain davart da Langnau. E quai ha l’equipa bernaisa nizzegià. Jesper Olofsson ha fatg il gol decisiv e chastià uschia il HCD per ses gieu passiv durant l’ultim quart’ura. Langnau è l’emprima equipa che batta il HCD durant questa stagiun a chasa. Pervia da la segunda sconfitta en seria resta il HCD sin plazza set da la tabella, pia en il champ d’amez da la tabella da la National League.
Ils ulteriurs resultats
- Ambri-Piotta – Rapperswil Jona Lakers 0:3
- Berna – Ajoie 6:0
- Bienna – Genevra-Servette 6:0
- Friburg – Losanna 2:5
- Lugano – Zug 3:2 (suenter prolungaziun)
