En la qualificaziun per la cursa da dumegnia ha il Brit ditg giu da cumbatter – l'ultima runda dal pilot da McLaren è dentant stada pli svelta dal di. Er davent l'emprima retscha parta damaun il Spagnol Carlos Sainz en il Ferrari. Terz è vegnì sensaziunalmain il pilot da Williams George Russell.
Sper Russell parta damaun Lewis Hamilton en la cursa. Il campiun mundial ha manchentà cleramain il podest. Quai suenter ch'el ha donnegià l'ala davant da ses auto e pli tard anc fatg ina piruetta sin il cirquit. Ses collega da Mercedes Valtteri Bottas è vegnì 7avel.
Verstappen a la fin dal classament
Il leader dal campiunadi actual, Max Verstappen, sto damaun parter davent da l'ultim plaz. El ha gia survegnì per la quarta giada questa stagiun in nov motor – lubì èn trais. Ord quest motiv ha il pilot oz er desistì da propi far rundas sin il cirquit da Sotschi. En il classament general ha el 5 puncts avantatg sin Hamilton. Sper Verstappen partan er il pilot da Ferrari Charles Leclerc ed il pilot da Williams Nicholas Latifi – er els omadus pervia da la midada da motor.
Ils pilots dad Alfa Romeo èn omadus gia crudads or suenter l'emprima part da la qualificaziun. Räikkönen, ch'aveva manchentà las ultimas duas cursas pervia da corona, parta damaun sco 14avel – Antonio Giovinazzi sco 16avel.