Suenter la qualificaziun dad ier avessan probabel paucs spetgà quest podest. Lewis Hamilton, avant Max Verstappen e Carlos Sainz. Verstappen aveva pervia da la quarta midada da motor stuì ir a la partenza davent da l'ultim plaz, Hamilton n'aveva betg pudì persvader en il qualifying. Auter Lando Norris e Carlos Sainz, ch'èn omadus partids oz davent da posiziun in e dus.
La plievgia decida la cursa
Ditg hai er vesì or sco sche Norris en il McLaren fetschia la cursa. Curt avant la fin era il Brit anc a la testa, ma lura hai cumenzà a plover. Entant ch'ils auters pilots èn sa decidids da midar 4 rundas avant la fin las rodas è Norris restà or sin il cirquit. Quai ha funcziunà sulettamain duas rundas, avant che la plievgia è vegnida pli intensiva, uschia che Norris ha tuttina stuì prender il viadi en la boxa per midar rodas. En quest mument e cun la plievgia ha el dentant pers bler temp ed è a la fin vegnì 7avel. Profità da quest sbagl ha Lewis Hamilton ch'è puspè a la testa en il classament general, 7 puncts avant il pilot da Red Bull, Max Verstappen.
Alfa Romeo fa puncts
In ch'ha er profità da la plievgia ed il caos curt avant la fin è il pilot dad Alfa Romeo Kimi Räikönnen. Il Finlandais ha suenter in lung temp da spetga puspè fatg puncts ed è vegnì 8avel. Ses collega d'equipa Antonio Giovinazzi è vegnì 15avel.
