Siglir tar il cuntegn

Pyeongchang 2018 La cursa rapida: Feuz è il favurit

Gievgia duessi finalmain gartegiar cun la cursa rapida dals umens ch’è vegnida spustada per plirs dis pervi dal ferm vent a Pyeongchang. Tge che resta dentant èn ils nums dals favurits, e tranter quels è Beat Feuz.

Il leader da la cursa rapida, Beat Feuz, parta sco in dals gronds favurits sche n’è betg sco il topfavurit en la cursa rapida dals gieus olimpics a Pyeongchang. Feuz ha persvadì en tut ils trenaments ed ha uschia demonstrà ch’el ha er enta maun la pista olimpica.

Beat Feuz è pront per il punct culminant

Beat Feuz è il grond trumf svizzer sin l’emprima medaglia svizra en il ski alpin. Il victur da la cursa rapida dal Lauberhorn e segund al classicher da Kitzbühel è en ina grondiusa furma ed ha laschà enavos il davos temp ina carta da visita che fa er patratgar la concurrenza.

Sper Beat Feuz valan en emprima lingia il duo norvegiais cun Aksel Svindal e Kjetil Jansrud sco gronds candidats da medaglia. In bun duo po era l’Italia trametter a la partenza cun Christof Innerhofer e Dominik Paris. Betg d’emblidar er il defensur, l’Austriac Matthias Mayer ch’ha medemamain persvadì en ils trenaments.

Cun Caviezel, ma senza Janka

Sper Beat Feuz ha oravant tut Mauro Caviezel las meglras cartas sin in plaz da podest en la cursa rapida olimpica. Il Grischun ha mussà en ils trenaments ch’el sa senta bain sin questa pista che n’è betg uschè pretensiusa sco bleras cursas da la cuppa mundiala. La clav da success saja en mintga cas da vegnir atras senza in sulet sbagl, uschia Mauro Caviezel.

Betg a la partenza è Carlo Janka. Il skiunz da Sursaissa ha pers il cumbat per il davos plaz da partenza encunter Marc Gisin ch’è stà en il davos trenament 7 tschientavels pli sperts che Janka. Curt suenter il trenament ha Gisin annunzià ses success cun in post dad Instagram:

Carlo Janka po uss dentant sa concentrar cumplainamain sin la cumbinaziun. Là ha el in plaz fix.

Sper il trio cun Beat Feuz, Mauro Caviezel e Marc Gisin trametta Swiss Ski anc il giuven Gilles Roulin a la partenza. Il skiunz turitgais ha merità ses plaz da partenza cun bunas prestaziuns durant l’entira stagiun.

Sportissimo 17:05