Siglir tar il cuntegn

Pyeongchang 2018 Ferm vent impedescha la cursa

Als gieus olimpics a Pyeongchang fa il vent in stritg tras il quint dals organisaturs. Quels èn sfurzads da spustar la cursa rapida dals umens. Enstagl da dumengia è quella previsa da nov la gievgia. Il ferm vent influenzescha dentant era autras disciplinas.

Persunas cun elements d'ina cursa da skis
Legenda: Magari gida era la meglra organisaziun nagut, e la natira è pli ferma. (maletg simbolic) Reuters

Ils organisaturs han gia baud stuì trair las consequenzas. Trais uras avant che la cursa rapida avess duì cumenzar a Jeongseon, ha l'aura fatg in stritg tras il quint. Il vent burascus avess procurà per cundiziuns fitg differentas per ils singuls skiunzs.

Per il directur da cursas FIS Markus Waldner n'è la decisiun insumma betg stada ina surpraisa. Ils meteorologs avevian annunzià ferm vent, e las prognosas sajan fitg exactas en la regiun.

Meglier davent da mesemna

La partenza da la cursa rapida dals umens è da nov planisada la gievgia a las 04:00 temp svizzer. Il nov termin munta, ch'il Super-G previs ha da nov lieu il venderdi. Tenor Markus Waldner quintan ils meteorologs ch'il vent lascha suenter la mesemna.

Uschia croda l'emprima decisiun alpina a Pyeongchang il glindesdi, cun il slalom gigant da las dunnas. Ils umens sa mesiran lura il mardi en la cumbinaziun alpina.

Era autras disciplinas han stuì vegnir spustadas

Il ferm vent a Pyeongchang influenzescha era autras disciplinas.
Uschia an ins stuì dir giu la qualificaziun dal slopestyle da las snowboardistas, ch'era previsa per dumengia en damaun. Il final è previs la notg che vegn. Damai ch'i n'ha dà nagina qualificaziun dastga mintga atleta absolver sulettamain dus percurs. Per la Svizra èn en acziun: Sina Candrian, Isabel Derungs, Elena Könz e Carla Somaini.

RR novitads 06:00