Siglir tar il cuntegn
Inhalt

Pyeongchang 2018 David Hablützel sto dar forfait als gieus olimpics

Trais dis suenter Iouri Podladtchikov sto cun David Hablützel il segund crack svizzer da la halfpipe dar forfait als gieus olimpics.

 purtret da David Hablützel
Legenda: David Hablützel sto per la segunda giada desister da prender part a gieus olimpics. Keystone

Il snowboardist era cupitgà grevamain il schaner al Laax Open. Il Turitgais ha tranter auter gì ina squassada dal tscharvè e grevas contusiuns al dies. Cunquai perda l'equipa dus candidats per ina top-rangaziun.

Sco David Halblützel ha detg, haja el dà tut per vegnir fit a temp. El sentia dentant ch'el saja be tar 60 fin 70 pertschient da sia capacitad da prestaziun. Sut questas circumstanzas na fetschia quai pauc senn da vulair cumbatter sin il pli aut nivel.

Cun Pat Burgener, il numer 8 dal mund, ed il snowboardist da reserva da 16 onns Elias Allenspach, restan a la Svizra anc dus debutants als gieus olimpics.