Il podest
- 1. Aksel Svindal (No) 1:40,25
- 2. Kjetil Jansrud (No) + 0,12 secundas
- 3. Beat Feuz + 0,18 secundas
Otg onns suenter ses emprim aur olimpic en il super-G a Vancouver gudogna Axel Svindal cun 35 onns aur en la cursa rapida a Pyeongchang. Il Norvegiais, ch'è adina puspè stà blessà, curunescha cun questa victoria sia carriera. Dasper ils dus titels olimpics ha Svindal era gudagnà tschintg medaglias d'aur tar campiunadis mundials. L'ultima avant tschintg onns.
Ses cumpatriot Kjetil Jansrud ha procurà per ina victoria dubla norvegiaisa. Jansrud è campiun olimpic en il super-G da Sotschi il 2014. En la cursa rapida da Sotschi è Jansrud vegnì terz. Lura anc davos l'Austriac Matthias Mayer ed il Talian Christof Innerhofer che n'han oz gì nagina schanza sin ina medaglia.
Feuz sin il podest
Il campiun mundial actual e leader da disciplina actual Beat Feuz gudogna per la Svizra la segunda medaglia als gieus olimpics en la Corea dal Sid. En ina cursa stretga perda el 0,18 secundas sin il victur e be 0,06 secundas sin il segund. Envers SRF ha Feuz ditg ch'el na sa sentivia betg propi bain durant la cursa. La raschun saja stada la naiv ch'eria pli glischnusa che durant ils trenaments.
Ils ulteriurs Svizzers
- 13. Mauro Caviezel + 1,61 secundas
- 21. Marc Gisin +2,57 secundas
- 33. Gilles Roulin + 3,63 secundas
Ils ulteriurs Svizzers n'han betg propi pudì persvader en la cursa roiala. Meglier è stà Mauro Caviezel sco 13avel.
Il proxim program
Suenter che pliras cursas han stuì vegnir spustadas pervi dal ferm vent, suonda uss in culp suenter l'auter. Gia il venderdi è il super-G dals umens sin il program. La cursa è tranter ils dus percurs dal slalom da las dunnas.
RR novitads 06:00