Jil Teichmann è sa qualifitgada per l'otgavelfinal dal French Open a Paris. La Svizra ha battì en ina partida epica suenter passa trais uras la Belarussa Victoria Azarenka en trais sets cun 4:6, 7:5 e 7:6. Teichmann cuntanscha uschia per l'emprima giada en sia carriera l'otgavelfinal dad in turnier da Grand Slam. En la proxima runda frunta Teichmann sin l'Americana Sloane Stevens ch'ha gudagnà l'US Open il 2017.
Belinda Bencic è out al French Open
Per Belinda Bencic è il French Open a fin suenter la 3. runda. La giugadra da tennis svizra ha pers la partida encunter la canadaisa da 19 onns, Leylah Fernandez cun 5:7, 6:3 e 5:7. Cun quai manchenta la campiunessa olimpica sia premiera da sa qualifitgar per l'8avel final a Roland-Garros.
Henri Laaksonen perda cunter Holger Rune
Henri Laaksonen è crudà or dal French Open. En la segunda runda ha il Svizzer pers encunter il Danais Holger Rune, quai cler cun 2:6, 3:6 e 3:6. Uschia na resta nagin svizzer pli en il tableau dals umens dal French Open. Stan Wawrinka era gia dà or en l'emprima runda encunter il Franzos Corentin Moutet.
Laaksonen aveva gudagnà il gieu da l'emprima runda cunter Pedro Martinez.