Siglir tar il cuntegn

Header

video
Il segund e ses meglier run dad Andri Ragettli en il final.
Or da Beijing 2022 Clips dals 16.02.2022.
laschar ir. Durada: 2 minutas 52 Secundas.
cuntegn

Freeski slopestyle Gronda trumpada per Andri Ragettli

Il campiun mundial da l’onn passà e grond favurit, Andri Ragettli da Flem, ha manchentà a Peking ina medaglia olimpica en sia disciplina da parada, il freeski slopestyle. Ragettli ha stuì sa cuntentar cun plaz 4 ed uschia cun l’uschenumnada medaglia da tgirom.

Podest

  1. Alexander Hall (USA) 90,01 puncts
  2. Nicholas Goepper (USA) 86,48 puncts
  3. Jesper Tjader (SWE) 85,35 puncts
  4. Andri Ragettli (SUI) 83,50 puncts

Andri Ragettli, ier anc gudagnà la qualificaziun, n'ha en nagins dals trais runs pudì persvader cumplainamain e mussar sia gronda classa. En il davos run ha el stuì metter tut sin ina charta. Suenter in sbagl gia tar l’emprim sigl ha el la finala interrut ses run.

Puspè mo in diplom olimpic

Il sportist da 23 onns ha mussà frustraziun en l’arrivada e fiers davent ses skis. Ses conturn cun trenaders e gidanters han consolà Andri Ragettli che vala sco in dals stars en la scena da freeski. Per Andri Ragettli èsi gia la segunda trumpada olimpica suenter ch’el aveva gia stuì sa cuntentar als davos gieus olimpics il 2018 a Pyeongchang cun il plaz 7 en il slopestyle.

audio
Per il favurit da slopestyle Ragettli n'èsi betg ì bain
ord Actualitad dals 16.02.2022.
laschar ir. Durada: 2 minutas 35 Secundas.

In diplom olimpic datti er per il segund svizzer en quest final, Fabian Bösch. El ha terminà la concurrenza sin plaz 6. Il terz svizzer, Kim Gubser da Tavau, ha stuì desister sin il final pervia da problems cun ina coissa.

Victoria dubla americana

Triumfà en questa concurrenza da freeski slopestyle ha Alexander Hall. L’American ha gudagnà avant ses cumpatriot Nicholas Goepper. Cumplettà il podest sco terz ha il Svedais Jesper Tjader.

RTR actualitad 06:00

Artitgels legids il pli savens