Siglir tar il cuntegn

Header

cuntegn

Fasa finala Èn prest 3 equipas sursilvanas en 3. liga?

La stagiun dal ballape regiunal è en la fasa finala. Las proximas duas fins d’emna crodan las davosas decisiuns rn la 2. fin la 4. liga. Involvidas fitg en ils cumbats da promoziun e relegaziun èn er trais equipas sursilvanas.

audio
Il campiunadi da ballape regiunal: Tge squadra fa il pass en la proxima liga?
ord Actualitad dals 21.06.2021.
laschar ir. Durada: 5 minutas 43 Secundas.

US Schluein Glion avant ina gronda sfida

La pli ferma equipa sursilvana, l’US Schluein Glion, sto temair da stuair bandunar la 2. liga. Suenter la terrada da 2:3 la davosa fin d’emna encunter il FC Rheineck è l’USSI crudada sut il stritg e n’ha uschia betg pli las cartas en ils agens mauns. Schluein Glion sto per tut pretsch gudagnar il davos gieu da campiunadi sonda proxima a chasa encunter il FC Montlingen e sperar che Rheineck u St. Margrethen dettian giu puncts. Cun Montlingen, il 5avel da la tabella, spetga però ina dira nusch sin Schluein Glion. Quest davos gieu da campiunadi cumenza la sonda a las 16:00 uras en l’Arena Crap Gries a Schluein.

CB Trun/Rabius cumbatta cunter la relegaziun

La suletta equipa sursilvana da terza liga, il CB Trun/Rabius, sa chatta medemamain sut il stritg. Sin il program stattan dentant anc duas rundas da campiunadi. E cun Sargans e Gams frunta Trun/Rabius sin dus adversaris che n’han er betg persvadì dal tut en questa stagiun scursanida pervia da la pandemia da corona. Trun/Rabius po uschia anc sperar vinavant da restar en questa terza liga, dovra però puncts en quests davos gieus. Er anc betg mitschà da la relegaziun è Tusaun-Cazas ch’ha be in punct dapli sin il conto che Trun/Rabius. Il club da la Cadi frunta dumengia proxima a las 15:00 uras a chasa sin Sargans e la sonda, ils 3 da fanadur, vegn spetgà il gieu decisiv ordaifer encunter Gams.

CB Lumnezia sin via en 3. liga

Cuntrari a Schluein Glion e Trun/Rabius vai al CB Lumnezia. Per ils Lumnezians vai en il davos gieu da campiunadi per la promoziun en la terza liga. Lumnezia ha gudagnà la fin d’emna passada ordaifer encunter Schlarigna cun 2:0 ed uschia salvà la schanza da far ord las atgnas forzas il pass da quarta en terza liga. Perquai sto Lumnezia gudagnar sonda proxima a las 14:00 uras a chasa encunter la segunda equipa da l’US Schluein Glion. Grategia quai dattan ils Lumnezians la proxima stagiun en terza liga, datti be in pari u perda Lumnezia quest derbi, lura fa il CB Surses il pass en 3. liga. Il mument maina Surses la tabella cun dus puncts avantatg. Surses ha dentant gia terminà il campiunadi.

Vai tenor palpiri èsi bain pussibel che gist trais equipas sursilvanas dattan l’onn proxim en la terza liga da ballape. Quai muntass er dapli duels cun vischins, dapli derbis, dapli tensiun en Surselva e probabel er dapli emoziuns.

RTR actualitad 17:00

Artitgels legids il pli savens