Siglir tar il cuntegn

Header

EVZ – SCB
Legenda: EVZ – SCB Emprim obstachel per Zug sin la via al titel èn ils Bernais Keystone
cuntegn

EVZ – SCB Cura, sche betg uss?

Cun ils playoffs cumenza per l'EV Zug la missiun titel per propi. A quella missiun dad ir per la segunda giada suenter il 1998 per la trofea da campiuns fa era in Rumantsch part. Claudio Cadonau ch'è defensur e che sa da las fermezzas da sia equipa ed era da las spetgas da tuttas varts sin il titel.

Entras sia clera dominanza durant la qualificaziun parta l'EV Zug era en ils playoffs sco cler favurit sin il titel. Quai vegnia spetgà dal club, dals fans, di Claudio Cadonau, ch'è dapi 1 onn defensur tar l'EVZ. Quai saja però era la finamira da mintga giugadur, che vegnia a dar dapli che 100%, per che la trofea arrivia suenter passa 20 onns puspè tar il club da la Svizra Centrala. Per Claudio Cadonau ch'è creschì si a Turitg, ch'ha sias ragischs era en Surselva, fissi ses segund titel. Sco fitg giuven è el il 2008 vegnì campiun svizzer cun ils ZSC Lions. Dentant ha el 32 onns ed ha sappientiv midà sin questa stagiun da Langnau tar Zug per anc ina giada pudair cumbatter cun in club ch'ha schanzas pli che intactas sin il titel.

audio
EV Zug e la missiun titel
03:21 min, Actualitad dals 13.04.2021.
laschar ir. Durada: 03:21 minutas.

En 5 dals 6 duels cunter ils Bernais en questa stagiun èn ils da Zug ids sco victurs giu dal glatsch. L'EVZ ensonuscha sias fermezzas, era sia qualitad e po surtut ir cun gronda confidenza en la seria da quart-final encunter il SCB. Ils Bernais han gì da morder ed han stuì prender la via sur ils pre-playoffs per insumma dumagnar en ils playoffs. En quella fasa da la stagiun pon els però esser privlus. Quai han els adina puspè mussà en il passà. Da quai èn era ils da Zug conscients. Las ultimas 3 serias da playoff encunter Berna ha Zug pers tuttas – 2017 e 2019 en il final.

Artitgels legids il pli savens

Scrollar a sanestra Scrollar a dretga