Siglir tar il cuntegn

Header

video
ll gol decisiv da Chloe Kelly
Or da Sport-Clip dals 31.07.2022.
laschar ir. Durada: 54 Secundas.
cuntegn

EURO 2022 Las Englaisas èn campiunessas europeicas dal ballape

Las Englaisas èn campiunessas europeicas ed han cunquai gudagnà lur prim grond titel. Las «Three Lionesses» han gudagnà la partida da final en il stadion da Wembley a Londra cunter la Germania, quai cun 2:1 suenter prolungaziun.

Il gol decisiv ha sajettà l'Englaisa Chloe Kelly en la 110avla minuta. Tras il gol dad Ella Toone, en la 62avla minuta eran las Englaisas idas en avantatg cun 1:0. En la 79avla minuta ha Lina Magull egualisà per la Germania al 1:1.

La Germania ha per l'emprima giada pers in final d'in campiunadi europeic da ballape e manchentà il 9avel titel.

video
Ils highlights dal final
Or da Sport-Clip dals 31.07.2022.
laschar ir. Durada: 8 minutas.

Gianna Klucker ha tippà sin las Tudestgas

Il campiunadi europeic è ì a fin la dumengia cun il final Germania encunter l’Engalterra. Questas equipas hajan merità d’esser en il final, manegia Gianna Klucker. Ella aveva gia avant il final fatg ina prognosa tgi ch'ella manegia che vegn a gudagnar. Da la partida da dumengia saira ha ella spetgà ina massa. Omaduas equipas hajan fatg fitg blers gols durant il turnier e sajan extrem fittas.

audio
La prognosa da Gianna Klucker per il final
ord Sport ed actualitad dals 31.07.2022.
laschar ir. Durada: 2 minutas 29 Secundas.

Per l’Engalterra haja pledì il fatg, ch’ellas giogan a chasa ed hajan il public sco sustegn, quai dettia franc ina massa energia. Tar la Germania saja durant ils turniers propi stà da sentir quant fitg ch’ellas veglian il titel, e quai dal stab da trenaders fin a las giugadras da reserva sin il banc.

L’ultim vegnian piculezzas a decider tgi che gudogni il buccal, ha ella ditg avant il gieu. Impurtant saja tge equipa che veglia dapli e saja pronta dad ir igl «extra meter». Ses tip era che la Germania gudogna la partida finala, la squadra haja questa veglia ch’i dovria per gudagnar ina partida uschè impurtanta.

La prestaziun svizra sut la marella

Per las dunnas svizras è il campiunadi europeic da ballape da las dunnas en l’Engalterra stà a fin suenter la fasa da gruppa. La ballapedista Gianna Klucker oriunda da Tumein ha valità per RTR la prestaziun da las dunnas svizras.

En general ins possia dir ch’i haja fatg grond plaschair da guardar ils gieus da l’equipa svizra. Quai di Gianna Klucker che dat cun las dunnas dal FC Rapperswil-Jona en la Super League da las dunnas.

audio
La prestaziun da las Svizras a l’EURO 2022: Ina valitaziun da Gianna Klucker
ord RTR Audio dals 30.07.2022.
laschar ir. Durada: 2 minutas 8 Secundas.
Ins vesa propi quest pass ch’il ballape da las dunnas ha fatg ils ultims onns.
Autur: Gianna Klucker ballapedista

Sche la Svizra ch’è actualmain il numer 20 dal mund fiss arrivada da surmuntar la fasa da gruppas, fiss quai stà ina gonda surpraisa. Gianna Klucker ch’enconuscha la scena da ballape – era in zic dischillusa da l’emprima partida da las Svizras encunter il Portugal. Surtut en la segunda mesadad n’hajan las Svizras betg mussà quai ch’ellas sappian. Da la partida avess ins pudì spetgar trais puncts. La fin hai dà in pari da 2:2. Quest punct è restà il sulet per las Svizras.

En ils gieus encunter la Svezia e l’Ollanda fiss tenor Gianna Klucker stà pussaivel dapli. Las Svizras hajan dentant fatg quai che saja stà pussaivel, e la fin finala n’haja betg bastà d’arrivar vinavant. Vis sur tut ils gieus hajan las Svizras mussà ina buna prestaziun, malgrà la grippa dal magun ch’aveva mulestà l’equipa durant il turnier. Quai saja positiv e fetschia speranza che las Svizras possian sa qualifitgar per il campiunadi mundial la proxima stad.

Las Tudestgas fruntan sin las Englaisas en il final

Las Tudestgas han gudagnà il mezfinal cunter las Franzosas cun 2:1. Omadus gols per las Tudestgas, mintgamai in per mesadad – ha sajettà la chapitania Alexandra Popp. Gist avant la pausa han las Franzosas egualisà, tras in autogol da la golia Merle Frohms.

video
La Germania suonda a l'Engalterra
Or da Sport-Clip dals 28.07.2022.
laschar ir. Durada: 5 minutas 38 Secundas.

Las Englaisas a moda suverana

Las ballapedistas englaisas èn sa qualifitgadas sco emprima equipa per il final. Ellas han battì las Svedaisas gist cun 4:0. Manà la partida a l'arbitra svizra Esther Staubli. L'Engalterra è per la terza giada en in final d'in campiunadi europeic – gartegià era quai gia il 1984 ed il 2009.

video
Nagina schanza per la Svezia cunter las Englaisas
Or da Sport-Clip dals 26.07.2022.
laschar ir. Durada: 5 minutas 40 Secundas.

Las Svizras èn crudadas ora en la fasa da gruppa

Las Svizras han pèrs cunter las favuritas da l'Ollanda cun 1:4. Fin en l'84avla minuta stevi anc pari 1:1. Per vegnir vinavant avessan las Svizras stuì batter las Ollandaisas. Victuras da la gruppa C èn las Svedaisas ch'han declassà il Portugal gist cun 5:0.

Ina terrada per las Svizras

Cun 1:2 perda la naziunala svizra encunter la Svezia. L'emprima mesadad dal gieu han ellas pudì dar senza laschar en in gol, ma er senza far in. En la 53avla minuta han lura las Svedaisas tutgà al 1:0, ma be duas minutas pli tard han las Svizras egualisà. Il gol decisiv han las Svedaisas lura dà en minuta 75.

La defensiun da las Svizras è stada ferma. Gist Luana Bühler ch'è glischnada en l'equipa da las 11 giugadras pervi dals problems dal magun da Rahel Kiwic ha dà defendì a moda suverana cun Viola Calligaris.

Nov Svizras cun problems dal magun

Suenter ina betg uschè mala emprima partida da las giugadras svizras cun in pari cunter il Portugal , han 9 dad ellas ed 11 ulteriurs collavuraturs dal team gì da sbatter cun problems dal magun. Las ballapedistas avevan dà giu tuttas activitads da medias che fissan stadas planisadas per glindesdi.

Las Svizras cumenzan cun in pari

video
Las Svizras ston sa cuntentar cun in pari cunter las Portugaisas
Or da Sport-Clip dals 09.07.2022.
laschar ir. Durada: 4 minutas 31 Secundas.

La Svizra ha cumenzà bain la partida. Gia suenter la segunda minuta ha Coumba Sow tutgà l'emprima giada cunter las Portugaisas – be trais minutas pli tard ha Rahel Kiwic fatg il 2:0. Lasuenter han las Svizras controllà il gieu e n'han permess nagin privel pli da la vart da las Portugaisas. Ellas n'èn dentant betg pli stadas activas en l'offensiva.

En la segunda mesadad dal gieu ha il Portugal lura dà gas. En la 58avla minuta ha Diana Gomes fatg l'emprim gol per il Portugal. Set minutas pli tard ha Jessica Silva tutgà per il 2:2. Omaduas equipas han gì durant las davosas minutas dal gieu la schnaza sin ina victoria. La partida è lura dentant ida a la fin cun in pari.

RTR novitads 21:00

Artitgels legids il pli savens

Scrollar a sanestra Scrollar a dretga