La Valisa resta sin la via da success, era suenter ses segund gieu en la gruppa A dal campiunadi europeic. Suenter il 1:1 da sonda passada cunter la Svizra, gudogna la Valisa cunter la Tirchia cun 2:0.
L’emprim gol ha Aaron Ramsey marcà en la 42avla minuta, suenter in pass da Gareth Bale. Quel ha pli tard manchentà da realisar in penalti. Il 2:0 è crudà en il temp supplementar, paucas secundas avant la fin. La Tirchia che ha dà avant la culissa da 30’000 aderents indigens, n’ha betg persvadì.
Era ils Russ han la schanza
La Russia ha vinavant la schanza da sa qualifitgar per ils otgavelfinals dal campiunadi europeic. Ils Russ han gudagnà cunter il noviz dal turnier la Finlanda cun 1:0. Alexej Mirantschuk ha marcà il sulet gol da la partida a St. Petersburg, en la prolungaziun da l'emprima mesadad.
Ella gruppa B han la Russia e la Finlanda suenter lur dus gieus sco la Belgia trais puncts sin il conto. Ils Beltgs giogan la gievgia cunter il Danemarc.