La Spagna na gudogna er betg il segund gieu da gruppa a Sevilla. Sin il gieu da 0:0 encunter la Svezia, suonda il pari da 1:1 encunter la Pologna. Robert Lewandowski ha gulivà en minuta 54 per la Pologna, fertant ch'il Spagnol Álvaro Morata aveva sajettà l'emprim gol per la Spagna. Gerard Moreno ha sajettà en minuta 58 in penalti vi da la pitga.
Per finir la prerunda, fruntan ils Spagnols lura anc sin la Slovachia.
La Germania gudogna cunter il Portugal
En il gieu cunter il Portugal ha l'equipa da Joachim Löw pudì recaltgar lur emprims puncts. Cun il resultat dad 4:2. En l'emprima mesadad ha Christiano Ronaldo sajetta suenter 15 minutas il emprim gol e cunquai era ses emprim gol insuma encunter la naziunala tudestga. Ma anc avant la fin da l'emprima mesadad van ils tudestg en avantatg cun dus autogols dals portuges. En la segunda mesadad grategia a Kai Havertz il 3:1. En la minuta 60 reussescha a Robin Gosens il 4:1. La situaziun en la gruppa F resta uschia interessanta. Anc nagina equipa ha segir il bigliet en il otgavel final.
Pari tranter Ungaria e Frantscha
La segunda runda en la gruppa F cumenza cun in pari tranter la Frantscha e l'Ungaria. Attila Fiola grategia en la prolungaziun da l'emprima mesadad il gol cunter il campiun mundial. En la segunda mesadad reussescha a Antoine Griezmann en la 66avla minuta il pari.