Siglir tar il cuntegn

Header

video
Cuppa mundiala da mountainbike a Lai
Or da sil punct dals 11.07.2022.
laschar ir. Durada: 1 minuta 57 Secundas.
cuntegn

Drama tar la cursa da chasa Schurter: «El ha sajettà giu mai»

En l'ultim guaud ha Mathias Flückiger empruvà da surpassar Nino Schurter. Deplorablamain n'è sia acziun betg gartegiada ed ha custà ad els omadus la victoria dubla. En l'arrivada ha Schurter lura er laschà or ses frust.

Puspè n'hai betg tanschì per Nino Schurter da gudagnar sia 34avla cursa da la cuppa mundiala ed uschia realisar in nov record. A Lai è il matador local però vegnì franà gist da ses cumpatriot e gì bler discletg. Fin curt avant l'arrivada era Nino Schurter a la testa avant ses cumpatriot Mathias Flückiger. Or dal guaud è lura dentant tuttenina il Talian Luca Braidot vegnì sco emprim, suenter el il Sidafrican Alan Hatherly. Sco terz è suandà Mathias Flückiger e sco quart lura Nino Schurter.

Sco Schurter ha ditg en l'arrivada, haja Flückiger empruvà da surpassar el en in lieu nua ch'i n'è betg stà pussibel. Els èn omadus crudads. Enstagl da plazza 1 e 2 per la Svizra hai uschia be dà plazza 3 e 4 per Flückiger e Schurter ch'è stà fitg trumpà e vilà ed ha er laschà sentir ses frust en l'intervista cun SRF. Quai na dastgia simplamain betg capitar, betg tar dus Svizzers e quai anc ad ina cursa da chasa, uschia Nino Schurter.

Ils dus umens paran dentant er da puspè avair fatg pasch suenter l'emprima gritta gist suenter la cursa:

purtret da Schurter e Flückiger che discurran in cun l'auter ed han mintgamai in maun sin la spatla da l'auter.
Legenda: Nino Schurter e Mathias Flückiger tar al rangaziun da la cursa a Lai. Sco i guarda or han ils dus umens tranter els puspè fatg pasch suenter il drama da l'entschatta. Keystone

Cun Filippo Colombo e Thomas Litscher èn anc dus ulteriurs svizzers classads sut ils top 10. Il Tessinais che aveva gudagnà il venderdi saira la cursa da short track è vegnì 5avel, Litscher 7avel. Er Vital Albin ha mussà ina grondiusa cursa. Il Lumnezian è vegnì 13avel cun in retard da 2:12 minutas. Il terz sursilvan a la partenza, Ursin Spescha da Sevgein, ha terminà la cursa sin plazza 81 cun in retard da radund 10 minutas.

Alessandra Keller sin il podest

video
Alessandra Keller procura per l'emprim plaz da podest svizzer dapi 3 onns
Or da Sport-Clip dals 10.07.2022.
laschar ir. Durada: 48 Secundas.

Finalmain – Per l'emprima giada dapi bun trais onns datti puspè ina plazza da podest per la Svizra en ina cursa da la cuppa mundiala tar las dunnas d'elita, quai grazia ad Alessandra Keller ch'è vegnida terza a la cursa da chasa a Lai.

video
Keller: «Jau hai savì che la cursa da Lai saja insatge per me»
Or da Sport-Clip dals 10.07.2022.
laschar ir. Durada: 1 minuta 35 Secundas.

Alessandra Keller ch'ha gia persvadì il venderdi en la cursa da short track cun il segund plaz ha er mussà en la cursa roiala ina grondiusa prestaziun. La finala ha ella cuntanschì l'arrivada cun in retard da 24 secundas sin la victura, la Franzosa Loana Lecomte. Segunda è vegnida la victura dal short track, la Svedaisa Jenny Rissveds. Quest trio era gia suenter l'emprima da tschintg rundas a la testa ed ha la finala pudì distanziar l'entira concurrenza per duas minutas e dapli. Per la decisiun ha Lecomte procurà cun in'attatga duas rundas avant la fin.

Loana Lecomte, Jenny Rissveds, Alessandra Keller
Legenda: Il podest da las dunnas d'elita cun Loana Lecomte (1.), Jenny Rissveds (2.) ed Alessandra Keller (3.) Keystone

Cun Jolanda Neff sco 6avla e Linda Indergand sco 9avla han anc duas ulteriuras svizras cuntanschì ina plazza sut las top 10 . Plinavant è Ramona Forchini vegnida 11avla e Sina Frei 16avla.

Gronda festa da mountainbike a Lai

Las cursas da la cuppa mundiala al pe dal Rothorn èn danovamain stadas in success cumplain. Aura perfetga, ina grondiusa culissa, bunas prestaziuns dals Svizzers ed uschè blers fans sco anc mai. Tut en tut han visità las cursas radund 27'000 fans durant ils trais dis. Dapli fans aveva Lai sulettamain carmalà il 2018 cun organisà il campiunadi mundial da mountainbike. Sche la cuppa mundiala turna era il 2023 enavos a Lai n'ha la UCI, l'Uniun da ciclissem internaziunala, anc betg decidì.

audio
Andreas Wieland cun ina bilantscha da la cuppa mundiala 2022 a Lai
ord Sport ed actualitad dals 10.07.2022.
laschar ir. Durada: 7 minutas 47 Secundas.

Svizras U23 manchentan piz a cup il podest

Las duas giuvnas mountainbikeras Noëlle Buri e Ronja Blöchlinger han manchentà be pauc ina plazza da podest en la categoria da las giuvnas sut 23 onns. Buri è vegnida quarta e Blöchlinger 5avla. Omaduas han pers passa duas minutas sin la victura, Sofie Pedersen ch’ha battì en il sprint final la Franzosa Line Burquier. Terza è vegnida l’Ollandaisa Puck Pieterse.

Top resultat per Ginia Caluori

La Grischuna Ginia Caluori ha persvadì a sia cursa da chasa. Ella è vegnida 16avla cun in retard da strusch sis minutas sin la victura. La sportista da 20 onns da Panaduz parta pir dapi bun in onn a cursas da mountainbike. Avant gieva ella cun skis. Il ski alpin restia vinavant ina passiun, er il far turas da skis nua ch’ella possia cumbinar il ir cun skis cun in bun trenament. Ma il cor battia uss per il sport da mountainbike, uschia Ginia Caluori ch’ha absolvì dacurt la matura e che cumenza en curt in studi en la scienza da sport.

audio
Ginia Caluori da Panaduz cuntenta cun sia prestaziun a Lai
ord Sport ed actualitad dals 10.07.2022.
laschar ir. Durada: 1 minuta 7 Secundas.

La cursa dals umens U23 ha gudagnà il Chilen Martin Vidaurre Kossmann. Meglier svizzer è vegnì Dario Lillo sco 7avel avant Alexandre Balmer sco 8avel. Il Grischun Janis Baumann dad Igis ha terminà la cursa sin plazza 20 cun in retard da 3:27 minutas sin il victur.

Ginia Caluori
Legenda: Ginia Caluori (20) da Panaduz parta Andreas Wieland



Grondiusas premissas per las cursas roialas

Ils Svizzers han persvadì il venderdi en las cursas da short track. Quai empermetta er bler per las cursas roialas.

Cun Nino Schurter e Mathias Flückiger ha la Svizra ils dus gronds trumfs en il cumbat per la victoria a Lai. Durant che Flückiger vul repeter ses success d'avant bun in mais a Leogang vul Nino Schurter anc ina giada triumfar a sia cursa da chasa ed uschia festivar la 34avla victoria en la cuppa mundiala, quai fiss in nov record mundial. Avant in onn aveva il Franzos Victor Koretzky triumfà avant Schurter e Flückiger.

audio
Nino Schurter e Vital Albin èn pronts per la cursa roiala
ord Actualitad dals 09.07.2022.
laschar ir. Durada: 2 minutas 57 Secundas.

Tar las dunnas han Jolanda Neff, Alessandra Keller, Sina Frei sco er Linda Indergand bunas chartas da far il pass sin il podest. Ma la concurrenza è ferma, quai mussa il passà. Il davos podest svizzer tar las dunnas d'elita en ina cursa da la cuppa mundiala da cross country giascha gia trais onns enavos.

Ursin Spescha sa legra sin la cursa da chasa

Dasper Nino Schurter e Vital Albin parta anc in terz Sursilvan a la cursa da cross country, numnadamain Ursin Spescha. Il giuven da 24 onns da Sevgein sa legra sin la cursa avant ils fans da chasa e parta cun la finamira da cuntanscher in plaz sut ils top 50. Per Spescha èsi la quarta cursa da la cuppa mundiala en questa stagiun.

audio
Discurs cun Ursin Spescha en vista a la cursa a Lai
ord Actualitad dals 09.07.2022.
laschar ir. Durada: 4 minutas 1 Secunda.

Jolanda Neff – il star tar las dunnas

Quai che Nino Schurter è tar ils umens è Jolanda Neff tar las dunnas – il star en la scena da cross country. E sco Nino Schurter ha er Jolanda Neff gudagnà quasi tut quai ch'i dat da gudagnar en quest sport. Avant bun in onn ha la Songagliaisa encurunà sia carriera cun il titel da campiunessa olimpica, il sulet titel che mancava anc en ses palmarès. Enconuschenta è Jolanda Neff però er pervia da ses chavels lungs e blonds. Ma dapi prest in mez onn n'èn ils chavels betg pli blonds, mabain brins.

audio
Jolanda Neff – il star svizzer tar las dunnas
ord Actualitad dals 09.07.2022.
laschar ir. Durada: 4 minutas 33 Secundas.

Balanche per l'emprima giada sin il podest a Lai

La Svizra sto spetgar vinavant sin l'emprima victoria da downhill a la cuppa mundiala a Lai. Camille Balanche è vegnida tar las dunnas d'elita segunda. La mountainbikera da Neuchâtel aveva gudagnà la qualificaziun ed uschia partida sco ina da las grondas favuritas. La finala è la Franzosa Myriam Nicole stada bun quatter secundas pli sperta che Balanche sin quest percurs da downhill al pe dal Rothorn. Per Camille Balanche, ch'ha gia gudagnà duas cursas da la cuppa mundiala en questa stagiun, èsi l'emprim plaz da podest a Lai. Cumplettà il podest sco terza ha la Taliana Eleonora Farina.

video
La cursa da downhill da Camille Balanche
Or da Sport-Clip dals 09.07.2022.
laschar ir. Durada: 1 minuta 45 Secundas.

Er tar ils umens hai dà ina victoria franzosa. Amaury Pierron ch'era gia stà il pli spert en la qualificaziun ha gudagnà avant il Canadais Finn Iles ed il Sidafrican Greg Minaar. Dal quartet svizzer ha sulet Lutz Weber cuntanschì in plaz sut ils top 30. Il downhiller da Thun che viva dentant dapi onns a Laax è vegnì 27avel.

4 plazs da podest en il short track

Ils Svizzers e las Svizras han briglià en las cursas da short track a Lai. Suenter ils dus plazs da podest tar las dunnas dad Alessandra Keller (2.) e Jolanda Neff (3.) han er ils umens svizzers procurà per dus plazs da podest. Il Tessinais Filippo Colombo ha triumfà piz a cup avant Mathias Flückiger.

video
Ils davos meters dal short track dals umens cun Colombo (1.), Flückiger (2.) e Schurter (4.).
Or da Sport-Clip dals 08.07.2022.
laschar ir. Durada: 1 minuta 25 Secundas.

Il Grischun Nino Schurter ch'è stà tut las 9 rundas en la gruppa da testa è vegnì quart. Gudagnà tar las dunnas ha la Svedaisa Jenny Rissveds. Vital Albin, a la davosa cursa da short track a Leogang en l'Austria anc sin il podest sco terz, ha stuì sa cuntentar cun il 25avel plaz avant ses fans da chasa.

Vital Albin: «La finamira è dad esser il meglier»

Ditg è Vital Albin stà en la sumbriva da ses gronds idols Nino Schurter e Mathias Flückiger. Dapi questa stagiun è quai auter. Va tut si sco giavischà po Vital Albin tegnair pitg e schizunt batter ils gronds stars da mountainbike dals davos onns.

audio
Vital Albin en vista a las cursas da chasa a Lai
ord Actualitad dals 07.07.2022.
laschar ir. Durada: 3 minutas 50 Secundas.
video
Vital Albin vul er persvader a la cuppa mundiala a Lai
Or da sil punct dals 07.07.2022.
laschar ir. Durada: 1 minuta 39 Secundas.

A la davosa cuppa mundiala avant in mais a Leogang en l’Austria è Vital Albin stà l’emprima giada sin il podest. En la cursa da short track è il Lumnezian vegnì terz. Ina sumegliant buna prestaziun vul il mountainbiker da 23 onns era mussar a sias cursas da chasa. El è sa preparà en l’Engiadina sin quest punct culminant. Durant duas emnas ha Albin frequentà cun l’equipa naziunala in camp da trenament en l’autezza a San Murezzan.

A Lai enconuscha Vital Albin quasi mintga centimeter da la cursa, il sustegn dals fans è garantì e la furma constat. Quai èn premissas idealas per procurar per in ulteriur exploit.

RTR actualitad 17:00

Artitgels legids il pli savens