Set etappas, totalmain 236 kilometers e passa 15’000 meters d’ascensiun, quai èn las cifras da la cursa extrema Transalpin Run. La cursa ha gia ina pulita tradiziun e procura mintga giada che plirs tschient curriduras e curridurs fan quel sforz. Davantvart da la partida tar la cursa da quest’onn è er il curridur engiadinais Micha Steiner. Ensemen cun ses collega d’equipa Gabriel Lombriser cumbatta el per ina plazza da podest tar il Transalpin Run.
Uschè ina cursa na pon ins betg trenar
«Il corp n'è betg fatg per ina tala cursa» di Micha Steiner da Samedan. Il curridur preferescha cursas pli curtas. Numnadamain è el «skyrunner», el curra il pli gugent uschè svelt ed uschè lev sco mo pussaivel sin ina muntogna. La plazza da partenza tar il Transalpin Run ha el en sasez mo survegnì perquai ch'in auter curridur è crudà ora. Uschia s'ha el bittà en l’aventura da questa cursa sur pliras etappas. Era sch'el n'enconuscha insumma betg talas cursas.
Premiera gartegiada
Era sch'il Transalpin Run 2021 è per Micha Steiner ina premiera, ha el mussà fin qua ina stupenta prestaziun. Ensemen cun Gabriel Lombriser è el segund dal classament general. E questa segunda plazza vul il duo sa chapescha defender fin a l’arrivada a Prad.