Fin avant in’emna n'era anc betg cler sche las cursas a San Murezzan pon avair lieu. La Confederaziun aveva prendì il Canada sin la glista da quarantina. Tenor quella avessan las skiunzas ch'eran l’emna passada anc per cursas a Lake Louise – stuì ir diesch dis en quarantina. Per las cursas da questa fin d’emna a San Murezzan n'avess quai betg pli tanschì. La Confederaziun ha en il fratemp però aboli la glista da quarantina - e las cursas da la cuppa mundiala èn uschia pussaivlas.
Organisà davent da l’entschatta tut culla finamira da pudair far cursas
Tar l’organisaziun da las cursas da San Murezzan n'han las decisiuns dal Cussegl Federal betg midà bler. Davent da l’entschatta ha ins cumenzà dad organisar l’eveniment cun la finamira che quel possia avair lieu. Bain ha quai dà in mument in zichel discussiuns, tuttina ha ins lavurà sco usità vi da la preparaziun e vi da l’infrastructura per garantir cursas. Uschia è uss tut pront per in spectacul sin pista. Las skiunzas èn arrivadas en Engiadin'Ota. Lara Gut-Behrami, Corinne Suter e tut las autras èn prontas per cumbatter per il podest.