Sper Jasmine Flury da Tavau ha er Stephanie Jenal da Samignun dastgà far per l’emprima giada il viadi en l’America dal Nord.
Stephanie Jenal ha dà ses debüt en la cuppa mundiala il december 2019 a las cursas da chasa a San Murezzan. Dapi lura ha la skiunza da 23 onns dastgà sa mesirar sis giadas cun las meglras skiunzas dal mund. Puncts n’hai dentant anc dà nagins. Il meglier resultat en la cuppa mundiala fin oz è il 33avel plaz en il super-g da St. Anton il schaner 2021.
A Lake Louise vul Stephanie Jenal uschia gudagnar ses emprims puncts da la cuppa mundiala. En emprima lingia giaja dentant er per rimnar experientscha, quai di er Beat Tschuor, il trenader da las skiunzas svizras. Dasper Jenal parta er Noemie Kolly per l’emprima giada a cursas da la cuppa mundiala en l’America dal Nord.